បរទេស៖ ទីភ្នាក់ងារសារព័ត៌មានរដ្ឋរបស់ចិន ស៊ិនហួ បានរាយការណ៍ថា ប្រទេសចិនបានឱ្យដឹងកាលពីថ្ងៃសុក្រថា ខ្លួននឹងបង្កើនអាយុចូលនិវត្តន៍របស់ប្រជាជនជាបណ្តើរៗ ខណៈពេលដែលប្រទេសនេះប្រឈមមុខនឹងវិបត្តិប្រជាសាស្រ្តដែលកំពុងកើនឡើង និងចំនួនប្រជាជនវ័យចំណាស់។
យោងតាមសារព័ត៌មាន VN EXPRESS ចេញផ្សាយកាលពីថ្ងៃទី១៣ ខែកញ្ញា ឆ្នាំ២០២៤ បានឱ្យដឹងថា “អាយុចូលនិវត្តន៍តាមច្បាប់សម្រាប់កម្មករជាបុរសនឹងត្រូវពន្យារជាបណ្តើរៗពី ៦០ ឆ្នាំទៅ ៦៣ ឆ្នាំ” ដែលជាការសម្រេចចិត្តរបស់មន្ត្រីក្រុងប៉េកាំង និងត្រូវបានចែករំលែកដោយស៊ីនហួ។
សម្រាប់ស្ត្រីកម្មករ អាយុចូលនិវត្តន៍នឹងត្រូវបានបន្ថែម “ពី ៥០ឆ្នាំ ឬ ៥៥ ឆ្នាំ ទៅ ៥៥ឆ្នាំ និង ៥៨ ឆ្នាំ” អាស្រ័យលើប្រភេទការងារ។
ប្រព័ន្ធផ្សព្វផ្សាយរដ្ឋបានផ្សាយថា អាយុចូលនិវត្តន៍នឹងចាប់ផ្តើមបង្កើនជាបណ្តើរៗក្នុងរយៈពេល ១៥ឆ្នាំ ចាប់ពីឆ្នាំ២០២៥។
បើតាមសារព័ត៌មានចិន ស៊ិនហួ បានឱ្យដឹងថា “ចាប់ពីឆ្នាំ ២០៣០ គឺឆ្នាំអប្បបរមានៃការរួមចំណែកសោធននិវត្តន៍ជាមូលដ្ឋានដែលតម្រូវឱ្យទទួលបានអត្ថប្រយោជន៍ប្រចាំខែ គឺនឹងត្រូវបានដំឡើងជាបណ្តើរៗពី ១៥ ឆ្នាំទៅ ២០ ឆ្នាំក្នុងល្បឿននៃការកើនឡើងចំនួនប្រាំមួយខែជារៀងរាល់ឆ្នាំ” ។
ច្បាប់ថ្មីនេះក៏នឹងអនុញ្ញាតឱ្យប្រជាជនចិន “ពន្យារពេលចូលនិវត្តន៍ទៅថ្ងៃក្រោយ ប្រសិនបើពួកគេឈានដល់កិច្ចព្រមព្រៀងជាមួយនិយោជក”៕
ប្រែសម្រួលៈ ណៃ តុលា
