យូអិន៖ បេសកជនចិន បានជំរុញឱ្យសហរដ្ឋអាមេរិកបញ្ឈប់ពីការធ្វើឱ្យខូចដល់សាមគ្គីភាពអន្តរជាតិ ការបង្កើតការបែកបាក់ និងការប្រឆាំងគ្នា និងការបង្កឱ្យមានការប្រឈមមុខដាក់គ្នាក្នុងប្លុកលើវិបត្តិអ៊ុយក្រែន។
លោក Geng Shuang តំណាងអចិន្ត្រៃយ៍រងរបស់ចិន ប្រចាំនៅអង្គការសហប្រជាជាតិបានឲ្យដឹងថា “នៅក្នុងវិបត្តិអ៊ុយក្រែន ដែលកំពុងបន្ត មានការហូរចូលឥតឈប់ឈរនៃអាវុធ និងគ្រាប់រំសេវជាច្រើនចូលទៅក្នុងសមរភូមិ”។
លោកបានព្រមានថា “វានឹងមានឥទ្ធិពលអវិជ្ជមានយ៉ាងទូលំទូលាយដល់សន្តិភាព និងសន្តិសុខអន្តរជាតិ និងក្នុងតំបន់” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ដោយកត់សម្គាល់ថា ប្រទេសចិន មានការព្រួយបារម្ភយ៉ាងខ្លាំង ចំពោះការកើនឡើងនៃភាពតានតឹងនៃសង្រ្គាមនាពេលថ្មីៗនេះ លោកឯកអគ្គរដ្ឋទូតបានលើកឡើងថា អាទិភាពសំខាន់នៃពេលនេះ គឺគោរពគោលការណ៍នៃការមិនពង្រីកសមរភូមិ គ្មានការបង្កើនការប្រយុទ្ធ និងគ្មានការបង្កហេតុដោយនរណាម្នាក់ ក្នុងគោលបំណងកាត់បន្ថយស្ថានការណ៍ឱ្យបានឆាប់រហ័ស”។
លោកបានអំពាវនាវឲ្យភាគីជម្លោះបង្ហាញឆន្ទៈនយោបាយជួបគ្នាពាក់កណ្តាលផ្លូវ បញ្ចប់អរិភាពមុននឹងចាប់ផ្តើមការចរចាសន្តិភាពឡើងវិញ។ លោកក៏បានអំពាវនាវដល់សហគមន៍អន្តរជាតិ ឱ្យត្រួសត្រាយផ្លូវឆ្ពោះទៅរកទីបញ្ចប់នេះដោយការផ្តល់ជំនួយ និងការសម្របសម្រួលជាក់ស្តែង ហើយបានជំរុញឱ្យភាគីពាក់ព័ន្ធទាំងអស់ដាក់សន្តិភាព និងមនុស្សជាតិជាមុនហើយបញ្ជូនធនធាន និងថាមពលរបស់ពួកគេឡើងវិញ ដើម្បីបញ្ចប់អរិភាពតាមរយៈការទូត៕
ប្រែសម្រួល ឈូក បូរ៉ា
