យ៉ាំងហ្គោន ៖ ចំនួនអ្នកស្លាប់ដោយសារទឹកជំនន់ របស់ប្រទេសមីយ៉ាន់ម៉ា បានកើនឡើងដល់ ២២៦នាក់ហើយ ខណៈមនុស្សចំនួន ៧៧នាក់ នៅតែបាត់ខ្លួន នេះបើយោងតាមក្រុមព័ត៌មាន នៃក្រុមប្រឹក្សារដ្ឋ របស់ប្រទេសមីយ៉ាន់ម៉ា។
របាយការណ៍បានឲ្យដឹងថា ទឹកជំនន់បានប៉ះពាល់ ដល់សង្កាត់រាប់សិបនៅទូទាំងប្រទេស ដោយបានសម្លាប់សត្វចំនួន ១២៨,៣៤៣ក្បាល។ អង្គការនេះបានបន្ថែមថា ជម្រកសរុបចំនួន ៤៣៨ ត្រូវបានបង្កើតឡើង សម្រាប់ជនរងគ្រោះដោយទឹកជំនន់។
របាយការណ៍បានឲ្យដឹងថា គិតត្រឹមថ្ងៃច័ន្ទ ទឹកជំនន់ក៏បានបំផ្លាញផ្ទះចំនួន ២,១១៦ខ្នង អគារមន្ទីរចំនួន ១១៧ខ្នង សាលារៀនចំនួន ១,០៤០ខ្នង អគារសាសនាចំនួន ៣៨៦ និងលិចលង់លើផ្ទៃដីដំណាំចំនួន ៦៤៣,០៨១ហិចតា។
របាយការណ៍បានបន្ដថា ទឹកជំនន់ដែលកំពុងរីករាលដាលនៅក្នុងប្រទេសអាស៊ីអាគ្នេយ៍មួយនេះ គឺបណ្តាលមកពីភ្លៀងធ្លាក់ខ្លាំង ដែលបង្កឡើងដោយព្យុះទីហ្វុង Yagi៕
ប្រែសម្រួល ឈូក បូរ៉ា
