តូក្យូ ៖ គណបក្សប្រជាធិបតេយ្យសេរី ដែលកំពុងកាន់អំណាច របស់ប្រទេសជប៉ុន នៅថ្ងៃពុធនេះ បានស្នើឱ្យបោះឆ្នោតជ្រើសរើស អ្នកស្នងតំណែងពីនាយករដ្ឋមន្ត្រីជប៉ុនលោក ហ្វូមីអូ គីស៊ីដា នៅពេលចាប់ផ្តើមសម័យប្រជុំ វិសាមញ្ញនៅថ្ងៃទី០១ ខែតុលា។
អ្នកឈ្នះក្នុងការបោះឆ្នោត ដឹកនាំរបស់គណបក្ស LDP នៅថ្ងៃទី២៧ ខែកញ្ញា ប្រាកដណាស់ថា នឹងក្លាយជានាយករដ្ឋមន្ត្រី ដោយសារតែសភាទាំងពីរ ត្រូវបានគ្រប់គ្រងដោយក្រុមចម្រុះ ដែលកំពុងកាន់អំណាច ហើយនាយករដ្ឋមន្ត្រីថ្មី ត្រូវតែមានការយល់ព្រមពីសភាទាំងពីរ។
សមាជិកសភាបាននិយាយថាកាលបរិច្ឆេទនឹងត្រូវបានបញ្ចប់នៅថ្ងៃទី២៤ ខែកញ្ញាដោយកំណត់ដំណាក់កាល សម្រាប់គណៈរដ្ឋមន្ត្រីបច្ចុប្បន្ន ដើម្បីសម្រេចជាផ្លូវការ លើកាលវិភាគនៅថ្ងៃតែមួយ។ ព័ត៌មានលម្អិតបន្ថែម រួមទាំងរយៈពេលនៃសម័យប្រជុំ នឹងត្រូវធ្វើឡើងក្រោមការដឹកនាំ របស់នាយករដ្ឋមន្ត្រីបន្ទាប់។
ក្នុងអំឡុងពេលនៃកិច្ចប្រជុំមន្ត្រីជាន់ខ្ពស់ទទួលបន្ទុកកិច្ចការសភានៅថ្ងៃពុធនេះ គណបក្សប្រជាធិបតេយ្យរដ្ឋ ធម្មនុញ្ញជប៉ុន ដែលជាគណបក្សប្រឆាំង ដ៏សំខាន់បានអំពាវនាវ ឱ្យមានពេលវេលាគ្រប់គ្រាន់ សម្រាប់ប្រធាន គណបក្សកាន់អំណាចថ្មី ដើម្បីថ្លែងសុន្ទរកថា និងឆ្លើយសំណួរ របស់មេដឹកនាំគណបក្សប្រឆាំង រួមទាំងនៅក្នុងគណៈកម្មាធិការថវិកាដ៏មានឥទ្ធិពលផងដែរ។
សំណើដែលធ្វើឡើងដោយប្រធានកិច្ចការ CDPJ លោក Jun Azumi ទៅកាន់សមភាគីបក្ស LDP របស់លោក Yasukazu Hamada បានកើតឡើងចំ ពេលមានការរំពឹងទុកកាន់តែខ្លាំងឡើងថា មេដឹកនាំថ្មីអាចនឹងជ្រើសរើសរំលាយសភាជាន់ទាប សម្រាប់ការបោះឆ្នោតភ្លាមៗ បន្ទាប់ពីចូលកាន់តំណែង៕
ប្រែសម្រួល ឈូក បូរ៉ា
