បរទេស ៖ យោងតាមការចេញផ្សាយរបស់ RT អ្នកស្រាវជ្រាវជនជាតិរុស្សីរាប់រយនាក់ ដែលធ្វើការនៅមន្ទីរពិសោធន៍រូបវិទ្យាភាគល្អិត CERN ក្នុងប្រទេសស្វីស នឹងត្រូវចាកចេញពីប្រទេសស្វីស នៅចុងឆ្នាំនេះ នេះបើតាមការចុះផ្សាយ របស់សារព័ត៌មាន Nature កាលពីថ្ងៃពុធ។
សារព័ត៌មានដដែលបាននិយាយថា អង្គការអ៊ឺរ៉ុប សម្រាប់ការស្រាវជ្រាវនុយក្លេអ៊ែរ (CERN) គ្រោងនឹងបញ្ចប់កិច្ចព្រមព្រៀង សហប្រតិបត្តិការរបស់ខ្លួន ជាមួយរុស្ស៊ីនៅថ្ងៃទី១ខែធ្នូ ដោយហាមប្រាមអ្នកវិទ្យាសាស្ត្រ ទាំងអស់ដែលមានទំនាក់ទំនងជាមួយប្រទេសនេះក្រោយការចាកចេញពីកន្លែងរបស់ខ្លួន។
យោងតាមរបាយការណ៍ បានឱ្យដឹងថា អ្នកវិទ្យាសាស្ត្រក៏នឹងត្រូវដកហូតសិទ្ធិស្នាក់នៅរបស់បារាំង ឬស្វីស ដែលពួកគេកាន់កាប់នា ពេលបច្ចុប្បន្ននេះផងដែរ។
CERN បានប្រកាសរួចហើយនូវផែនការរបស់ខ្លួន ក្នុងការកាត់ផ្តាច់ទំនាក់ទំនង ជាមួយនឹងអ្នកឯកទេសរុស្ស៊ីនៅដើមឆ្នាំនេះ។ វាបានសម្រេចចិត្តមិនបន្តកិច្ច ព្រមព្រៀងសហប្រតិបត្តិការ របស់ខ្លួនជាមួយរុស្ស៊ី ត្រឡប់មកវិញក្នុងខែធ្នូ ឆ្នាំ ២០២៣ ហើយកិច្ចព្រមព្រៀង ដែលមានស្រាប់នឹងផុតកំណត់ នៅថ្ងៃទី៣០ខែវិច្ឆិកា។
កាលពីនៅក្នុងខែមីនា ប្រធានផ្នែកទំនាក់ទំនងប្រព័ន្ធផ្សព្វផ្សាយ របស់ CERN បាននិយាយថា អង្គការនេះនៅតែមាន អ្នកឯកទេសតិចជាង ៥០០នាក់នៅតែជាប់ទាក់ទងជាមួយអង្គការរុស្ស៊ីណាមួយ ដោយបន្ថែមថា គ្មាននរណាម្នាក់ក្នុងចំណោម ពួកគេមិនអាចធ្វើការនៅ CERN នៅពេលដែលកិច្ចព្រមព្រៀង ផុតកំណត់នោះទេ ៕
ប្រែសម្រួល៖ស៊ុនលី
