បរទេស ៖ យោធាអ៊ីស្រាអែល បាននិយាយនៅថ្ងៃអង្គារថា ខ្លួនបានវាយប្រហារលើគោលដៅជាច្រើនរបស់ពួកហេសបូឡានៅភាគខាងត្បូងប្រទេសលីបង់ នៅពេលយប់ មួយថ្ងៃបន្ទាប់ពីខ្លួន បានបើកការវាយប្រហារ តាមអាកាសប្រឆាំង នឹងទីតាំងរបស់ក្រុម ដែលគាំទ្រដោយអ៊ីរ៉ង់ នៅក្នុងថ្ងៃដែលមានមនុស្សស្លាប់បំផុត នៅក្នុងប្រទេសលីបង់ ក្នុងរយៈពេលជាច្រើនទសវត្សរ៍។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២៤ ខែកញ្ញា ឆ្នាំ២០២៤ បានឱ្យដឹងថា ក្រុមហេសបូឡា នៅព្រឹកថ្ងៃអង្គារ បាននិយាយថា ខ្លួនបានវាយប្រហារគោលដៅ យោធាអ៊ីស្រាអែលជាច្រើន រួមទាំងបំផ្ទុះរោងចក្រដែលស្ថិតនៅចម្ងាយ ៦០ គីឡូម៉ែត្រ ចូលទៅក្នុងប្រទេសអ៊ីស្រាអែល ជាមួយនឹងគ្រាប់រ៉ុក្កែត Fadi ។
វាបាននិយាយថា បានវាយប្រហាររោងចក្រគ្រឿងផ្ទុះប្រហែលម៉ោង ៤ ព្រឹក (0100 GMT) និងអាកាសយានដ្ឋាន Megiddo បីដងដាច់ដោយឡែកពីគ្នា នៅពេលយប់។
បន្ទាប់ពីជិតមួយឆ្នាំនៃសង្រ្គាមប្រឆាំង នឹងក្រុមហាម៉ាស់នៅតំបន់ហ្គាហ្សានៅព្រំដែនភាគខាងត្បូងរបស់ខ្លួន អ៊ីស្រាអែលកំពុងផ្លាស់ប្តូរការ ផ្តោតអារម្មណ៍របស់ខ្លួនទៅកាន់ព្រំដែន ភាគខាងជើង ជាកន្លែងដែលក្រុមហេសបូឡាបានបាញ់រ៉ុក្កែតចូលអ៊ីស្រាអែល ដើម្បីគាំទ្រក្រុមហាម៉ាស់ ដែលគាំទ្រដោយអ៊ីរ៉ង់ផងដែរ ។
យោធាអ៊ីស្រាអែលបាន និយាយថា ខ្លួនបានវាយប្រហារលើក្រឡាក្រុមសកម្មប្រយុទ្ធ Hezbollah ហើយកាំភ្លើងធំ និងរថក្រោះ ដោយបានវាយប្រហារ គោលដៅរបស់ក្រុម Hezbollah ផ្សេងទៀតនៅភាគខាងត្បូង។ ប៉ូលិសនៅភាគខាងជើងអ៊ីស្រាអែលបាននិយាយថា បំណែកនៃកាំជ្រួចស្ទាក់ចាប់ត្រូវ បានរកឃើញនៅតាមតំបន់ផ្សេងៗ។
អាជ្ញាធរលីបង់បាននិយាយថា ការវាយប្រហារតាមអាកាសរបស់អ៊ីស្រាអែល លើប្រទេសលីបង់កាលពីថ្ងៃចន្ទ បានសម្លាប់មនុស្សជិត ៥០០ នាក់ និងបានបញ្ជូនមនុស្សរាប់ម៉ឺននាក់ ភៀសខ្លួនដើម្បីសុវត្ថិភាព ៕
ប្រែសម្រួលៈ ណៃ តុលា
