បរទេស ៖ យោងតាមការចេញ ផ្សាយរបស់ RT រដ្ឋមន្ត្រីការពារជាតិ អង់គ្លេសលោក John Healey កាលពីថ្ងៃចន្ទបានច្រានចោល ការអំពាវនាវ របស់ប្រធានាធិបតី បារាំង Emmanuel Macron ឱ្យបញ្ឈប់ការផ្តល់អាវុធ ដល់អ៊ីស្រាអែល ។
នៅក្នុងបទសម្ភាសន៍មួយជា មួយក្រុមអ្នកយកព័ត៌មាន របស់ Sky News លោក Healey បានផ្តល់សញ្ញាថា ចក្រភពអង់គ្លេស នឹងមិនគាំទ្រគំនិត ផ្តួចផ្តើមរបស់ Macron ទេព្រោះប្រទេសទាំងពីរមានប្រព័ន្ធផ្សេងគ្នា សម្រាប់ការផ្គត់ផ្គង់អាវុធ។
គេបានដឹងថាសប្តាហ៍នេះ គឺជាគម្រប់ខួបមួយឆ្នាំចាប់ តាំងពីការវាយប្រហារ របស់ពួកហាម៉ាស លើភាគខាងត្បូងអ៊ីស្រាអែល ដែលនាំទៅដល់ប្រតិបត្តិការយោធាចុងក្រោយនៅតំបន់ ហ្គាហ្សាមកទល់បច្ចុប្បន្ននេះ។
ប្រតិបត្តិការនេះ បានបង្កើនភាពតាន តឹងរវាងអ៊ីស្រាអែល និងប្រទេសមូស្លីម ជិតខាងដែលមានភាគីខាងប៉ាឡេស្ទីនជាដើ មហើយ កាលពីដើមខែនេះ ទន្ទឹមនឹងនោះ អ៊ីស្រាអែល បានបើកប្រតិបត្តិការ ជើងគោកនៅលីបង់ ស្របពេលដែលអ៊ីរ៉ង់ វាយប្រហាររដ្ឋជ្វីហ្វនេះមកវិញ តាមរយៈការវាយប្រហារដោយមីស៊ីល ជាច្រើនរយគ្រាប់។
គួរឲ្យដឹងដែរថានៅក្នុងបទសម្ភាសន៍ ជាមួយប្រព័ន្ធផ្សព្វផ្សាយ បារាំងដែលបានចាក់ផ្សាយ កាលពីថ្ងៃសៅរ៍ លោក Macron បាននិយាយថា បណ្តាប្រទេស លោកខាងលិចគួរតែ បញ្ឈប់ការផ្តល់អាវុធ ដល់អ៊ីស្រាអែល ដោយសង្កត់ធ្ងន់លើតម្រូវការ សម្រាប់ដំណោះស្រាយ នយោបាយប៉ុណ្ណោះគួរតែត្រូវបានធ្វើឡើង ចំពោះវិបត្តិនៅមជ្ឈិមបូព៌ា និងព្រមានថា ប្រទេសលីបង់អាចប្រែ ទៅជាមានស្ថានភាពដូចនៅ ហ្គាហ្សាដែរ ៕
ប្រែសម្រួល៖ស៊ុនលី
