យេរ៉ូសាឡឹម៖ អ៊ីស្រាអែល បានប្រារព្ធខួបលើកទីមួយ នៃការវាយលុកដ៏សាហាវ របស់ពួកហាម៉ាសកាលពីខែតុលា ឆ្នាំមុន ដែលជាការវាយប្រហារមួយ ដែលបានធ្វើឱ្យសហគមន៍ ភាគខាងត្បូងមានការភ្ញាក់ផ្អើល បញ្ឆេះសង្រ្គាម និងបង្កឱ្យមានការភ័យខ្លាច នៃជម្លោះមជ្ឈិមបូព៌ា កាន់តែទូលំទូលាយ។
ពិធីរំលឹកវិញ្ញាណក្ខន្ធបានចាប់ផ្តើមនៅម៉ោង ៦ និង ២៩នាទី ព្រឹក ម៉ោងក្នុងស្រុក ដែលជាពេលវេលាពិតប្រាកដ ដែលក្រុមយុទ្ធជនហាម៉ាស់ បានរំលោភលើរបងព្រំដែន ហើយបានបើកការវាយឆ្មក់ ដ៏សាហាវដោយសម្លាប់ជនស៊ីវិលនៅផ្ទះ និងក្នុងពិធីបុណ្យតន្ត្រីមួយ។
មនុស្សជាង ១២០០ នាក់ត្រូវបានសម្លាប់នៅក្នុងការវាយប្រហារដំបូងដោយ ២៥១ នាក់ត្រូវបានចាប់ពង្រត់។ មន្ត្រីអ៊ីស្រាអែលបានឲ្យដឹងថា ចំណាប់ខ្មាំង ១០១ នាក់នៅតែបន្តនៅតំបន់ហ្គាហ្សា ដែលប្រហែលពាក់កណ្តាលនៃពួកគេត្រូវបានគេជឿថាបានស្លាប់ក្នុងការចាប់ខ្លួន។
ពេញមួយថ្ងៃ ស្ថានីយ៍ទូរទស្សន៍ និងវិទ្យុអ៊ីស្រាអែល បានធ្វើការផ្សាយផ្ទាល់ ពីអ្នកនៅរស់រានមានជីវិត និងគ្រួសារ ដែលមានទុក្ខសោក។ ការវាយលុកនិងផលវិបាក របស់វាមានផលប៉ះពាល់ជាយូរមកហើយ ខណៈដែលអ៊ីស្រាអែល បន្តប្រតិបត្តិការយោធា របស់ខ្លួននៅតំបន់ហ្គាហ្សា។
អាជ្ញាធរសុខាភិបាលនៅតំបន់ហ្គាហ្សា បានរាយការណ៍ថាមានអ្នកស្លាប់ជិត ៤២,០០០នាក់ ភាគច្រើនជាស្ត្រី និងកុមារ ដែលជាលទ្ធផលនៃការវាយប្រហារ តាមអាកាស និងការបាញ់កាំភ្លើងធំ របស់អ៊ីស្រាអែល ចាប់តាំងពីការវាយប្រហារនៅខែតុលាមក។
អង្គការសហប្រជាជាតិ បានព្រមានអំពីវិបត្តិមនុស្សធម៌ “ដ៏មហន្តរាយ” ដោយលើកឡើងពីគ្រោះទុរ្ភិក្ស និងជំងឺដែលរីករាលដាល បន្ទាប់ពីការបិទផ្លូវរបស់អ៊ីស្រាអែល នូវធនធានសំខាន់ៗទៅកាន់តំបន់នោះ៕
ប្រែសម្រួល ឈូក បូរ៉ា
