រុស្ស៊ី ប្រកាសបង្ហាញអំពីផែនការជំនួប រវាងមេដឹកនាំប្រទេសដែលមាន នុយក្លេអ៊ែរធំៗទាំង៥ នៅក្នុងទីក្រុងញូវយ៉ក

បរទេស៖ យោងតាមការចេញផ្សាយរបស់ RT អនុរដ្ឋមន្ត្រីការបរទេសរុស្ស៊ីលោក Sergey Ryabkov បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា ប្រទេសដែលមានអាវុធនុយក្លេអ៊ែរ ឈានមុខគេទាំង៥ របស់ពិភពលោកត្រូវបានគេរំពឹងថា នឹងរៀបចំកិច្ចប្រជុំធំមួយ នៅទីក្រុងញូវយ៉កនៅចុងខែនេះ។

ទម្រង់ប្រជុំដែលត្រូវបានគេដាក់ឈ្មោះ The Nuclear Five ក្រៅផ្លូវការគឺជាការប្រមូលផ្តុំសមាជិកអចិន្ត្រៃយ៍ នៃក្រុមប្រឹក្សាសន្តិសុខអង្គការសហប្រជាជាតិ ដែលមានរួមមានប្រទេសរុស្ស៊ី ចិន សហរដ្ឋអាមេរិក ចក្រភពអង់គ្លេស និងបារាំង ។

ប្រទេសទាំង៥នេះក៏ត្រូវបានគេស្គាល់ដែរថា P5 ហើយលោក Ryabkov បានកត់សម្គាល់ថា តួនាទីជាប្រធានបង្វិលនៃ P5 នឹងត្រូវផ្ទេរពីទីក្រុងមូស្គូទៅកាន់ទីក្រុងប៉េកាំងឆាប់ៗនេះ។

មន្ត្រីជាន់ខ្ពស់រូបនេះក៏បានលើកឡើងដែរថា យើងសូមជូនពរឱ្យប្រទេសចិនទទួលបាន ជោគជ័យក្នុងគ្រាដ៏លំបាកនេះ។ ពួកគេអាចពឹងផ្អែកលើការគាំទ្ររបស់យើង ហើយយើងសង្ឃឹមថា អ្នកចូលរួមទាំងបីលោកខាងលិចក្នុងទម្រង់នេះ នឹងមានឥរិយាបទយ៉ាងហោចណាស់ ក្នុងន័យស្ថាបនាបន្ថែមទៀត។

លោក Ryabkov បាននិយាយថា ការពិភាក្សារបស់ក្រុមនេះនឹងធ្វើឡើង ក្នុងសម័យប្រជុំនៃគណៈកម្មាធិការទីមួយនៃ មហាសន្និបាតអង្គការសហប្រជាជាតិ ដែលជាស្ថាប័នទទួលបន្ទុកលើ បញ្ហាការរំសាយអាវុធ និងសន្តិសុខអន្តរជាតិ៕

ប្រែសម្រួល៖ ស៊ុន លី