ថ្ងៃទី ១១ ខែតុលា តាមម៉ោងក្នុងតំបន់ ក្នុងឱកាសខួប ៥២ឆ្នាំ នៃបង្កើតទំនាក់ទំនងការទូតរវាងចិន និងអាល្លឺម៉ង់ សកម្មភាពស្តីពីការផ្លាស់ប្តូរប្រជាជននិងប្រជាជនដើម្បីអបអរខួប ១០ឆ្នាំ នៃការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងអាល្លឺម៉ង់ដែលរៀបចំដោយ អគ្គស្ថានីយវិទ្យុ និងទូរទស្សន៍មជ្ឈិមចិនបានប្រារព្ធធ្វើនៅទីក្រុង Munich ប្រទេសអាល្លឺម៉ង់ដោយជោគជ័យ។ គម្រោងសហប្រតិបត្តិការមួយចំនួនលើវិស័យប្រព័ន្ធសារព័ត៌មាន ភាពយន្ត និងកម្មវិធីទូរទស្សន៍ជាដើមត្រូវបានដាក់ឱ្យដំណើរការនៅថ្ងៃដដែល។
លោកស្រី Xing Bo អគ្គនាយករងនៃអគ្គស្ថានីយវិទ្យុ និងទូរទស្សន៍មជ្ឈិមចិនបានថ្លែងថា អគ្គស្ថានីយវិទ្យុ និងទូរទស្សន៍មជ្ឈិមចិនរីករាយចាប់ដៃជាមួយមិត្តភក្តិមកពីគ្រប់មជ្ឈដ្ឋានក្នុងប្រទេសអាល្លឺម៉ង់ ដើម្បីក្លាយទៅជាអ្នកជំរុញវិបុលភាព និងការអភិវឌ្ឍរវាងប្រទេសចិន និងអាល្លឺម៉ង់ ចែករំលែកកាលានុវត្តភាព និងភាគលាភដែលបានមកពីការធ្វើអោយស៊ីជម្រៅដោយគ្រប់ជ្រុងជ្រោយថែមទៀតកំណែទម្រង់របស់ប្រទេសចិន ក្លាយទៅជាអ្នកកត់ត្រានៃការយល់ដឹងពីគ្នាទៅវិញទៅមក រវាងប្រទេសចិននិងអាល្លឺម៉ង់ ជំរុញប្រជាជននៃប្រទេសទាំងពីរឱ្យមានភាពកាន់តែជិតស្និទ្ធជាមួយគ្នា ធ្វើជាអ្នកជំរុញការរៀនសូត្រពីអរិយធម៌ទៅវិញទៅមករវាងចិន និងអាល្លឺម៉ង់ និងធ្វើឱ្យស៊ីជម្រៅនូវកិច្ចសហប្រតិបត្តិការផ្នែករួមគ្នាថត និងផលិតកម្មវិធី រួមគ្នារៀបចំសកម្មភាពប្រព័ន្ធផ្សព្វផ្សាយ ការច្នៃប្រឌិតថ្មីខាងវិទ្យាសាស្ត្រ និងបច្ចេកវិទ្យា។ល។
លោក Franz Josef Pschierer អតីតរដ្ឋមន្ត្រីក្រសួងសេដ្ឋកិច្ច ថាមពល និងបច្ចេកវិទ្យានៃរដ្ឋBavariaប្រទេសអាល្លឺម៉ង់ បានថ្លែងថា ឆ្លងតាមការផ្សព្វផ្សាយរបស់ប្រព័ន្ធសារព័ត៌មានចិន ខ្ញុំពិតជាមានការភ្ញាក់ផ្អើលជាខ្លាំងដែលបានមើលឃើញថា តន្ត្រីបុរាណអាល្លឺម៉ង់មានប្រជាប្រិយភាពខ្លាំងនៅក្នុងប្រទេសចិន ខ្ញុំសង្ឃឹមថាតាមរយៈការចែករំលែកវប្បធម៌ និងសិល្បៈទៅវិញទៅមក យើងអាចកសាងស្ពានមិត្តភាព និងជំរុញកិច្ចសហប្រតិបត្តិការបន្ថែមទៀតរវាងប្រទេសទាំងពីរក្នុងវិស័យសេដ្ឋកិច្ច និងវិស័យផ្សេងៗទៀត៕
