តេអេរ៉ង់ ៖ រដ្ឋមន្ត្រីការបរទេសអ៊ីរ៉ង់ លោក Seyyed Abbas Araghchi បានព្រមានថា សហរដ្ឋអាមេរិក នឹងបង្កគ្រោះថ្នាក់ ដល់កងទ័ពរបស់ខ្លួន ដោយដាក់ពង្រាយប្រព័ន្ធ ការពារដែន អាកាសរបស់ពួកគេ ទៅកាន់ប្រទេស អ៊ីស្រាអែល ដើម្បីប្រតិបត្តិការ ប្រព័ន្ធការពារ មីស៊ីលរបស់អាមេរិក។
ការកត់សម្គាល់របស់លោក Araghchi នៅលើប្រព័ន្ធផ្សព្វផ្សាយ សង្គមបានធ្វើ តាមរបាយការណ៍ ដែលថាទីក្រុងវ៉ាស៊ីនតោន បានសម្រេចចិត្តបញ្ជូនប្រព័ន្ធ ការពារតំបន់រយៈកម្ពស់ខ្ពស់ (THAAD) របស់ខ្លួន ទៅកាន់ប្រទេសអ៊ីស្រាអែល ដែលជាវិធានការមួយ ដែលតម្រូវឱ្យបុគ្គលិក អាមេរិកគ្រប់គ្រងប្រព័ន្ធនេះ ។
លោករដ្ឋមន្ត្រី បានចោទប្រកាន់ សហរដ្ឋអាមេរិកថាបានផ្តល់ “កម្រិតមិនធ្លាប់មាននៃជំនួយយោធា” ដល់អ៊ីស្រាអែល ដោយបានចែករំលែកតួលេខដែលបង្ហាញពីជំនួយយោធារបស់សហរដ្ឋអាមេរិកដល់អ៊ីស្រាអែល ឈានដល់ ១៧,៩ពាន់លានដុល្លារ ក្នុងឆ្នាំ២០២៤ ដែលជាកំណត់ត្រា កម្រិតខ្ពស់មួយ។
លោក Araghchi បានបញ្ជាក់ថា “សហរដ្ឋអាមេរិកបាន នឹងកំពុងផ្គត់ផ្គង់ អ៊ីស្រាអែល នូវកម្រិតអាវុធជាកំណត់ត្រា” នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ ។
លោកក៏បានគូសបញ្ជាក់ពីកិច្ចខិតខំប្រឹងប្រែងរបស់អ៊ីរ៉ង់ ក្នុងការទប់ស្កាត់ជម្លោះក្នុងតំបន់កាន់តែទូលំទូលាយដោយបន្ថែមថា “យើងមិនមានបន្ទាត់ក្រហមនោះទេ នៅពេលនិយាយអំពីការការពារប្រជាជន និងផលប្រយោជន៍របស់យើង” ។
មន្ទីរបញ្ចកោណបានបញ្ជាក់កាលពីថ្ងៃសុក្រថា ខ្លួននឹងដាក់ពង្រាយប្រព័ន្ធ ការពារដែនអាកាស THAAD ទៅកាន់ប្រទេស អ៊ីស្រាអែល ដើម្បីបង្កើនសមត្ថភាព ការពារមីស៊ីលរបស់ខ្លួន បន្ទាប់ពីការវាយប្រហារ ដោយមីស៊ីលរបស់អ៊ីរ៉ង់៕
ប្រែសម្រួល ឈូក បូរ៉ា
