បរទេស៖ យោងតាមប្រភពមួយបានឱ្យដឹងថា គណៈកម្មាធិការរៀបចំការបោះឆ្នោត (EC) របស់ប្រទេសថៃ បានរកឃើញហេតុផលដែលសង្ស័យថា អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា ជាអ្នកខាងក្រៅគណបក្ស មានឥទ្ធិពលខុសច្បាប់លើ និងរៀបចំគណបក្សភឿថៃ ដែលកំពុងកាន់អំណាច ក៏ដូចជាគណបក្សចំនួនប្រាំផ្សេងទៀតនៅក្នុងសម្ព័ន្ធពីមុន។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១៩ ខែតុលា ឆ្នាំ២០២៤ បានឱ្យដឹងដោយផ្អែកតាមប្រភពបាននិយាយថា ដូចនេះ គណៈកម្មាធិការរៀបចំការបោះឆ្នោត (EC) បានសម្រេចចិត្តបើកការស៊ើបអង្កេតជាផ្លូវការលើការប្រព្រឹត្តមិនត្រឹមត្រូវដែលត្រូវបានចោទប្រកាន់នេះ ដែលត្រូវបានបង្ហាញនៅក្នុងញត្តិចំនួនប្រាំមួយដែលបានដាក់ជូន និងពិនិត្យពីមុនដោយ EC ដោយអ្នកដាក់ញត្តិផ្សេងៗគ្នា។
គណបក្សចំនួនប្រាំផ្សេងទៀតគឺគណបក្ស Bhumjaithai, គណបក្ស United Thai Nation , គណបក្ស Palang Pracharath (PPRP) , គណបក្ស Chartthaipattana និងគណបក្ស Prachachart ។
ប្រភពដដែលបានបន្តថា ការស៊ើបអង្កេតត្រូវបានទុកពេល ៣០ថ្ងៃ ដើម្បីបញ្ចប់ ប៉ុន្តែកាលបរិច្ឆេទអាចត្រូវបន្តទៀត។
អ្នកដាក់ញត្តិក៏បានស្នើឱ្យ EC ពិចារណាជាផ្លូវការ សុំឱ្យតុលាការធម្មនុញ្ញរំសាយគណបក្សនយោបាយទាំងអស់នេះ ពីបទយល់ព្រមលើឥទ្ធិពល និងឧបាយកលរបស់លោកថាក់ស៊ីន ដែលពួកគេជឿថាជាការរំលោភលើមាត្រា ២៨ នៃច្បាប់សរីរាង្គស្តីពីគណបក្សនយោបាយ។
ឥទ្ធិពលខាងក្រៅ និងឧបាយកលត្រូវបានចាត់ទុកថាជាការរំលោភលើមាត្រា ២៩ នៃច្បាប់ដូចគ្នា អ្នកប្តឹងជំទាស់។
តុលាការមានសិទ្ធិអំណាចតាមមាត្រា ៩២ (៣) នៃច្បាប់ដូចគ្នានេះ ដើម្បីបញ្ជាឱ្យរំលាយគណបក្សនយោបាយទាំងនេះ ប្រសិនបើគណបក្សទាំងនោះត្រូវបានបង្ហាញថា បានបំពានច្បាប់នេះដូចការចោទប្រកាន់ , នេះបើយោងតាមញត្តិ៕
ប្រែសម្រួលៈ ណៃ តុលា
