បរទេស៖ អាជ្ញាធររបស់ប្រទេសថៃ កំពុងតាមរកបុរសម្នាក់ដែលគំរាមបាញ់សម្លាប់រង្គាលតាមប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍ នៅផ្សារ Khon Kaen Central Plaza ។ សន្តិសុខនឹងត្រូវបានបង្កើននៅទីតាំងងាយរងគ្រោះទូទាំងខេត្តភាគឦសានក្នុងអំឡុងចុងសប្តាហ៍។
យោងតាមសារព័ត៌មាន បាងកកប៉ុស្តិ៍ ចេញផ្សាយកាលពីថ្ងៃទី១៨ ខែតុលា ឆ្នាំ២០២៤ បានឱ្យដឹងថា ប៉ូលិសបានរាយការណ៍កាលពីថ្ងៃសុក្រថា ជនសង្ស័យមានឈ្មោះ Sai Sun Paur អាយុ ២២ឆ្នាំជនជាតិមីយ៉ាន់ម៉ា មិនត្រូវបានបញ្ជាក់ថាជាអ្នកនៅពីក្រោយការបង្ហោះនៅលើ Facebook នោះទេ ព្រោះរូបថត និងឈ្មោះរបស់គាត់អាចត្រូវបានគេក្លែងបន្លំ។
សារបង្ហោះមួយមានកាំភ្លើងខ្លីមួយដើមដែលមានចំណងជើងថា គាត់នឹងទៅដល់ផ្សារទំនើបក្នុងរយៈពេល ៣០នាទី។
ជាការឆ្លើយតប មន្ត្រីប៉ូលិសជាង ២០០នាក់ ត្រូវបានដាក់ពង្រាយទៅកាន់ផ្សារទំនើបក្នុងសង្កាត់ Muang នៅម៉ោង ៧ យប់ថ្ងៃព្រហស្បតិ៍។ អតិថិជនត្រូវបានជម្លៀសចេញ ហើយហាងនានាបានបិទមុនកាលកំណត់ ទោះបីជាមិនមានការបាញ់ប្រហារក៏ដោយ។
ផ្សារផ្លាហ្សាបានបើកដំណើរការជាធម្មតាវិញនៅថ្ងៃសុក្រ ដោយមន្ត្រីរក្សាវត្តមាន ដើម្បីធានាសុវត្ថិភាពសាធារណៈ៕
ប្រែសម្រួលៈ ណៃ តុលា
