ព្យុងយ៉ាង៖ ទីភ្នាក់ងារចារកម្មរបស់ប្រទេសកូរ៉េខាងត្បូង NIS បានឲ្យដឹងថា វាជាការដាក់ពង្រាយកងកម្លាំងជើងគោក ទ្រង់ទ្រាយធំលើកដំបូងរបស់ទីក្រុងព្យុងយ៉ាង ដើម្បីជួយរុស្ស៊ីធ្វើសង្គ្រាមនៅក្នុងប្រទេសអ៊ុយក្រែន។
សេវាស៊ើបការណ៍ជាតិបានឲ្យដឹងថា ទីក្រុងព្យុងយ៉ាង បានដាក់ពង្រាយកងកម្លាំងពិសេសចំនួន ១,៥០០ នាក់នៅចន្លោះថ្ងៃទី០៨ ខែតុលា និងថ្ងៃអាទិត្យចុងក្រោយទៅកាន់ទីក្រុងវ្លាឌីស្ដុក ក្នុងតំបន់ចុងបូព៌ារបស់រុស្ស៊ី ហើយការបញ្ជូនអង្គភាពទីពីរ ត្រូវបានគេរំពឹងថា នឹងប្រព្រឹត្តទៅក្នុងពេលឆាប់ៗនេះ ការផ្លាស់ប្តូរនេះបានបញ្ជាក់ពី “ការចាប់ផ្តើមនៃការចូលរួមរបស់កូរ៉េខាងជើងនៅក្នុងសង្រ្គាម” ។
ទាហានកូរ៉េខាងជើងបច្ចុប្បន្នកំពុងឈរជើងជាមួយអង្គភាពយោធារុស្ស៊ី ក្នុងតំបន់ចុងបូព៌ា និងកំពុងទទួលការហ្វឹកហ្វឺន។ ប្រភពពី NIS បានឲ្យដឹងថា នៅពេលដែលពួកគេបញ្ចប់វា ពួកគេត្រូវបានគេរំពឹងថា នឹងត្រូវបានដាក់ពង្រាយទៅកាន់តំបន់ជួរមុខ។
ទីភ្នាក់ងារចារកម្មបានបន្ថែមថា មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យដោយផ្ទាល់នូវកងទ័ពកងកម្លាំងពិសេសពីរដងក្នុងខែសីហា និងខែកញ្ញា មុនពេលការដាក់ពង្រាយរបស់ពួកគេ។
NIS បានឲ្យដឹងទៀតថា ទាហានត្រូវបានចេញអត្តសញ្ញាណប័ណ្ណក្លែងក្លាយ ដែលស្រដៀងនឹងអ្នកស្រុកនៅស៊ីបេរី ដែលមានមុខស្រដៀងនឹងជនជាតិកូរ៉េខាងជើង ដើម្បីធ្វើជាទាហានរុស្ស៊ី។
ទីភ្នាក់ងារនេះបានសន្យាថានឹង “បន្តតាមដានយ៉ាងជិតស្និទ្ធ និងផ្ទៀងផ្ទាត់កិច្ចសហប្រតិបត្តិការយោធារុស្ស៊ី-កូរ៉េខាងជើង” ដោយធ្វើការយ៉ាងជិតស្និទ្ធជាមួយភ្នាក់ងារស៊ើបការណ៍សម្ងាត់នៃសម្ព័ន្ធមិត្តកូរ៉េខាងត្បូង៕
ប្រែសម្រួល ឈូក បូរ៉ា
