បរទេស ៖ យោងតាមការ ចេញផ្សាយរបស់ RT ប្រធានាធិបតីរុស្ស៊ីលោក Vladimir Putin បាននិយាយថា ការគំរាមកំហែងណាមួយ ដែលធ្វើឡើងប្រឆាំងនឹងរុស្ស៊ី នឹងធ្វើឱ្យប្រទេសនេះ មានភាពក្លាហានតែប៉ុណ្ណោះ ។
ប្រធានាធិបតីរុស្សីរូបនេះបានថ្លែងនៅក្នុងសន្និសីទសារព័ត៌មានមួយ នៅចុងបញ្ចប់នៃកិច្ចប្រជុំកំពូល BRICS នៅទីក្រុង Kazan កាលពីថ្ងៃព្រហស្បតិ៍ ។
លោកបានបន្តថា ៖ អ្នកអាចគំរាមកំហែងនរណាម្នាក់ ។ វាគ្មានន័យទេក្នុងការគំរាមកំហែងដល់រុស្ស៊ី ចាប់តាំងពីរឿងនេះ ធ្វើឱ្យយើងមានភាពក្លាហានឡើង ដោយក្នុងនោះអតីតសមភាគីអាមេរិករបស់លោក Donald Trump ក៏ធ្លាប់បានគម្រាមទម្លាក់គ្រាប់បែក នៅទីក្រុងមូស្គូផងដែរ។
ប្រធានាធិបតីរុស្ស៊ីបានបន្ថែមថា ការលើកឡើងរបស់លោក Trump គឺគ្រាន់តែជាការពិភាក្សាយុទ្ធនាការ ដែលមិនគួរត្រូវបានគេយកចិត្តទុកដាក់ខ្លាំងពេក។ លោកបានបន្តថា លោកមិនទុកវាក្នុងចិត្តសម្រាប់ការសន្ទនា បែបនេះជាមួយលោក Trump ទេ ។
គួរឲ្យដឹងដែរថា អតីតប្រធានាធិបតីអាមេរិក និងជាបេក្ខជនគណបក្សសាធារណរដ្ឋបច្ចុប្បន្ន បានធ្វើសេចក្តីថ្លែងការណ៍នៅក្នុងបទសម្ភាសន៍ជាមួយកាសែត Wall Street Journal កាលពីថ្ងៃសុក្រ ដោយអះអាងថា លោកបានប្រាប់មេដឹកនាំរុស្ស៊ីថា ៖ ប្រសិនបើអ្នកដើរតាមអ៊ុយក្រែន ខ្ញុំនឹងវាយប្រហារអ្នកឲ្យខ្លាំង ។ ខ្ញុំនឹងវាយអ្នកភ្លាមៗនៅកណ្តាលទីក្រុងម៉ូស្គូ យើងជាមិត្ត។ ខ្ញុំមិនចង់ធ្វើទេ ប៉ុន្តែខ្ញុំគ្មានជម្រើសទេ។
ជាមួយគ្នានេះ លោកPutin បានសរសើរការសន្យាម្តងហើយម្តងទៀតរបស់លោក Trump ក្នុងការនាំយកជម្លោះរវាងរុស្ស៊ី និងអ៊ុយក្រែនដល់ទីបញ្ចប់។ លោកបាននិយាយថា ទីក្រុងមូស្គូស្វាគមន៍ ចំពោះគំនិតផ្តួចផ្តើមសន្តិភាពណាមួយ មិនថាអ្នកណាជាអ្នកបង្ហាញនោះទេ ដោយលោកបានរំលឹកឡើងវិញ នូវការត្រៀមខ្លួនរបស់ប្រទេសក្នុងការចូលរួម ក្នុងកិច្ចចរចាសន្តិភាពនានា៕
ប្រែសម្រួល៖ស៊ុនលី
