សិង្ហបុរី៖ នៅថ្ងៃសុក្រនេះ លោក Tharman Shanmugaratnam ប្រធានាធិបតីសិង្ហបុរី បានអបអរសាទរចំពោះលោក Luong Cuong ដែលត្រូវបានតែងតាំងឲ្យធ្វើជាប្រធានាធិបតីថ្មីរបស់ប្រទេសវៀតណាម ។
ឧត្តមសេនីយយោធាវ័យ ៦៧ ឆ្នាំរូបនេះ គឺជាប្រធានាធិបតីទី៤ របស់ប្រទេសវៀតណាម ក្នុងរយៈពេល ៣ឆ្នាំចុងក្រោយនេះ បន្ទាប់ពីមានវិបត្តិនយោបាយ ។ លោកបានជំនួសតំណែងលោក To Lam ដែលបានធ្វើជាប្រធានាធិបតីកាលពីខែឧសភា បន្ទាប់ពីអ្នកកាន់តំណែងមុនចំនួន ០២រូប ត្រូវបានបណ្តេញចេញពីមុខតំណែងនៅក្នុងការប្រយុទ្ធប្រឆាំងអំពើពុករលួយ ។
ក្រសួងការបរទេសសិង្ហបុរី ហៅកាត់ថា (MFA) បានឲ្យដឹងនៅថ្ងៃសុក្រនេះថា នៅក្នុងលិខិតមួយ លោក Tharman បានអបអរសាទរចំពោះលោក Cuong ។
លោក Tharman បានថ្លែងថា “ភាពជាដៃគូយុទ្ធសាស្ត្ររវាងប្រទេសសិង្ហបុរី និងវៀតណាម បានរីកចម្រើនពីភាពខ្លាំងមួយឈានទៅដល់ភាពខ្លាំងថែមទៀត” ។
គួររំលឹកថា កាលពីឆ្នាំមុន សិង្ហបុរី និងវៀតណាម បានប្រារព្ធខួបលើកទី៥០ នៃទំនាក់ទំនងការទូតរវាងប្រទេសទាំង២ និង ១០ឆ្នាំនៃទំនាក់ទំនងដៃគូយុទ្ធសាស្ត្ររបស់ប្រទេសទាំង ២នេះ ៕
ប្រែសម្រួលដោយ៖ ម៉ៅ បុប្ផាមករា
