អង់ការ៉ា៖ អាជ្ញាធរតួកគីបានឲ្យដឹងថា ពួកគេបានកំណត់អត្តសញ្ញាណជនដៃដល់ពីរនាក់ គឺបុរសម្នាក់ និងស្ត្រីម្នាក់ដែលបានធ្វើការវាយប្រហារភេរវកម្មកាលពីថ្ងៃពុធ លើទីស្នាក់ការកណ្តាល ឧស្សាហកម្មអាកាសចរណ៍តួកគី (TUSAS) ក្នុងទីក្រុងអង់ការ៉ា។
យោងតាមរដ្ឋមន្ត្រីមហាផ្ទៃលោក Ali Yerlikaya បានឲ្យដឹងថា អ្នកវាយប្រហារទាំងពីរត្រូវបានបញ្ជាក់ថាជាសមាជិកនៃគណបក្សពលករឃឺដ (PKK) ដែលមិនស្របច្បាប់។
ការវាយប្រហារដែលពាក់ព័ន្ធនឹងកាំភ្លើងស្វ័យប្រវត្តិ និងគ្រឿងផ្ទុះបានបណ្តាលឲ្យមនុស្ស ៥នាក់ស្លាប់ និង ២២aនាក់ផ្សេងទៀតរងរបួស។ យោងតាមទូរទស្សន៍ក្នុងស្រុក NTV អ្នករបួសប្រាំបីនាក់បានចេញពីមន្ទីរពេទ្យចាប់តាំងពីពេលនោះមក។
បន្ទាប់ពីការវាយប្រហារនេះ តួកគី បានបង្កើនវិធានការសន្តិសុខ ជាពិសេសនៅព្រលានយន្តហោះ ខណៈពេលដែលគ្មានក្រុមណាមួយចេញមុខអះអាងទទួលខុសត្រូវ ចំពោះការវាយប្រហារនេះ រដ្ឋមន្ត្រីការពារជាតិតួកគី លោក Yasar Guler បានបញ្ជាក់ថា យោធាបានឆ្លើយតបដោយការវាយប្រហារទៅលើគោលដៅ PKK ចំនួន ២៩ នៅភាគខាងជើងប្រទេសអ៊ីរ៉ាក់ និង ១៨ នៅភាគខាងជើងប្រទេសស៊ីរី៕
ប្រែសម្រួល ឈូក បូរ៉ា
