គៀវ៖ ប្រព័ន្ធផ្សព្វផ្សាយ Ukrayinska Pravda បានរាយការណ៍ថា ប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានបញ្ជាក់កាលពីថ្ងៃពុធថា ប្រទេសរបស់លោក បានស្នើសុំមីស៊ីល Tomahawk រយៈចម្ងាយឆ្ងាយពីសហរដ្ឋអាមេរិក។
លោកបានលើកឡើងថា “នេះគឺជាព័ត៌មានសម្ងាត់រវាងអ៊ុយក្រែន និងសេតវិមាន” ដោយបានអត្ថាធិប្បាយលើ របាយការណ៍ប្រព័ន្ធផ្សព្វផ្សាយថ្មីៗ ដែលស្នើឱ្យទីក្រុងគៀវ បានស្នើសុំមីស៊ីល Tomahawk ពីអាមេរិក។
លោកប្រធានាធិបតីបានបន្ដថា អ៊ុយក្រែនបានស្នើសុំមីស៊ីលរយៈចម្ងាយឆ្ងាយ ដែលជាផ្នែកមួយនៃ “ផែនការជ័យជំនះ” របស់ខ្លួន ដែលគ្រោងនឹងប្រើប្រាស់វាលុះត្រាតែរុស្ស៊ី បន្តបង្កើនជម្លោះ។
ប្រធានាធិបតីអ៊ុយក្រែនរូបនេះ បានបន្ដថា “ខ្ញុំបាននិយាយថា វាជាឧបករណ៍ការពារ” នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
កាលពីដើមសប្តាហ៍នេះ ប្រព័ន្ធផ្សព្វផ្សាយលោកខាងលិចបានរាយការណ៍ថា លោក ហ្សេឡិនស្គី បានស្នើសុំមីស៊ីល Tomahawk ពីសហរដ្ឋអាមេរិក ដែលជាផ្នែកនៃ “កញ្ចប់រារាំងមិនមែននុយក្លេអ៊ែរ” នៅក្នុង “ផែនការជ័យជំនះ” របស់លោក ៕
ប្រែសម្រួល ឈូក បូរ៉ា
Recommended for you
