បរទេស៖ តុលាការក្រុងម៉ូស្គូកាលពីថ្ងៃចន្ទ បានចេញដីកាចាប់ខ្លួនលោក Haykel Ben Mahfoudh ដែលជាចៅក្រមតុលាការឧក្រិដ្ឋកម្មអន្តរជាតិ (ICC) ដែលកំពុងប្រឈមនឹងការចោទប្រកាន់ពីបទ ស្ថានភាពនៃការជាប់ពន្ធនាគារដោយ គ្មានសិទ្ធិអំណាចតវ៉ាផ្លូវច្បាប់ នៅក្នុងប្រទេសរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី១១ ខែវិច្ឆិកា ឆ្នាំ២០២៤ បានឱ្យដឹងថា អ្នកនាំពាក្យរបស់តុលាការបានប្រាប់សារព័ត៌មាន TASS ថា លោក Ben Mahfoudh ក៏ត្រូវបានដាក់ក្នុងបញ្ជីតាមចាប់ខ្លួនអន្តរជាតិផងដែរ។ សេចក្តីសម្រេចមានន័យថា លោក Ben Mahfoudh នឹងត្រូវឃុំខ្លួនភ្លាមៗ ប្រសិនបើគាត់ធ្វើដំណើរទៅកាន់ប្រទេសរុស្ស៊ី ឬត្រូវបានធ្វើបត្យាប័នដោយប្រទេសទីបី។
លោកមានទំនួលខុសត្រូវក្នុងការ កំណត់គោលដៅទៅលើឧត្តមសេនីយកំពូល របស់ប្រទេសរុស្ស៊ី និងអតីតរដ្ឋមន្ត្រីការពារជាតិរបស់ខ្លួន។ ការចោទប្រកាន់ដាក់ពន្ធនាគារមិនពិតកើតចេញពី ការសម្រេចរបស់លោកក្នុងការចេញដីកា ចាប់ខ្លួនអតីតរដ្ឋមន្ត្រីការពារជាតិរុស្ស៊ីលោក Sergey Shoigu និងអគ្គសេនាធិការរបស់ប្រទេសលោក Valery Gerasimov។ ប្រសិនបើរកឃើញថាមានកំហុស លោក Ben Mahfoudh ប្រថុយនឹងការជាប់ពន្ធនាគាររហូតដល់ ៤ ឆ្នាំសម្រាប់បទល្មើសនេះ ស្របតាមច្បាប់របស់រុស្ស៊ី។
ដីការបស់តុលាការ ICC សម្រាប់លោក Shoigu និង លោក Gerasimov ដែលត្រូវបានចេញកាលពីខែមិថុនា ជុំវិញបទឧក្រិដ្ឋកម្មសង្រ្គាម ដែលបានប្រព្រឹត្តក្នុងអំឡុងពេលជម្លោះអ៊ុយក្រែន បានក្លាយជាសកម្មភាពអរិភាពចុងក្រោយបង្អស់ ដែលធ្វើឡើងដោយស្ថាប័នអន្តរជាតិប្រឆាំងនឹងរុស្ស៊ី ៕
ប្រែសម្រួលៈ ណៃ តុលា
