យេរ៉ូសាឡឹម៖ អ៊ីស្រាអែលបានប្រកាសកាលពីថ្ងៃអង្គារថា ខ្លួនបានបើកច្រកឆ្លងកាត់ Kissufim Crossing ដើម្បីអនុញ្ញាតឱ្យរថយន្តជំនួយ មនុស្សធម៌ចូលទៅកាន់តំបន់ហ្គាហ្សា ដោយស្របតាមកាលកំណត់ ដោយសហរដ្ឋអាមេរិក សម្រាប់អ៊ីស្រាអែល ដើម្បីបង្កើនលទ្ធភាពទទួលបាន ជំនួយទៅកាន់តំបន់ប៉ាឡេស្ទីន ដែលរងគ្រោះដោយសង្រ្គាម។
ការសម្របសម្រួលសកម្មភាព រដ្ឋាភិបាលរបស់អ៊ីស្រាអែលនៅក្នុងដែនដី (COGAT) ដែលជាអង្គភាពក្រសួងការពារជាតិ បានចេញផ្សាយរូបថត និងវីដេអូ ដែលបង្ហាញពីរថយន្តដឹកទំនិញ ដែលផ្ទុកដោយអាហារពីកម្មវិធី ស្បៀងអាហារពិភពលោកនៅច្រកឆ្លងកាត់ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
COGAT បានឲ្យដឹងក្នុងសេចក្តីថ្លែងការណ៍មួយថា ការផ្លាស់ប្តូរនេះត្រូវបានធ្វើឡើង “ស្របតាមការណែនាំពីផ្នែកនយោបាយ និងជាផ្នែកមួយនៃកិច្ចខិតខំប្រឹងប្រែង និងការប្តេជ្ញាចិត្តដើម្បីបង្កើនបរិមាណ និងផ្លូវនៃជំនួយទៅកាន់តំបន់ហ្គាហ្សាស្ទ្រីប” ការចែកចាយរួមមានអាហារ ទឹក ការផ្គត់ផ្គង់វេជ្ជសាស្រ្ត និងឧបករណ៍សម្រាប់ជម្រក សម្រាប់តំបន់ហ្គាហ្សាកណ្តាល និងភាគខាងត្បូង។
ការិយាល័យបានឲ្យដឹងទៀតថា “ជំនួយបានចូលទៅក្នុងតំបន់ហ្គាហ្សា បន្ទាប់ពីការត្រួតពិនិត្យសន្តិសុខ យ៉ាងតឹងរ៉ឹងនៅច្រកឆ្លងកាត់ Kerem Shalom ដោយអធិការសន្តិសុខមកពីអាជ្ញាធរ ឆ្លងកាត់ព្រំដែននៃក្រសួងការពារជាតិ”។ នៅក្នុងលិខិតមួយកាលពីថ្ងៃទី១៣ ខែតុលា រដ្ឋមន្ត្រីការបរទេសអាមេរិក លោក Antony Blinken និងរដ្ឋមន្ត្រីការពារជាតិលោក Lloyd Austin បានព្រមានថា គោលនយោបាយរបស់អ៊ីស្រាអែល ក្នុងការរឹតបន្តឹងយ៉ាងខ្លាំងដល់ការចូលប្រើប្រាស់ មនុស្សធម៌ទៅកាន់តំបន់ហ្គាហ្សា អាចនាំឱ្យមានការកម្រិតផ្លូវច្បាប់ របស់សហរដ្ឋអាមេរិក លើជំនួយយោធាដល់អ៊ីស្រាអែល។
លិខិតនេះបានបញ្ជាក់ពីតម្រូវការមួយចំនួន រួមទាំងការអនុញ្ញាតឱ្យរថយន្តដឹកជញ្ជូន ជំនួយយ៉ាងហោចណាស់ ៣៥០ គ្រឿងចូលទៅកាន់តំបន់ហ្គាហ្សាប្រចាំថ្ងៃ ការបើកច្រកឆ្លងកាត់ទីប្រាំទៅ កាន់តំបន់ដែលត្រូវបានបិទ ដោយអនុញ្ញាតឱ្យអ្នកស្រុកនៅក្នុងជំរុំឆ្នេរ ដែលគ្រប់គ្រងដោយអ៊ីស្រាអែល ផ្លាស់ប្តូរទីតាំងក្នុងដីមុនរដូវរងា និងធានាឱ្យមានលទ្ធភាពទទួលបាន សម្រាប់ក្រុមជំនួយដែលរងផលប៉ះពាល់ខ្លាំង នៅភាគខាងជើងហ្គាហ្សា ៕
ប្រែសម្រួល ឈូក បូរ៉ា
