វ៉ាស៊ីនតោន៖ រដ្ឋមន្ត្រីការបរទេសអាមេរិក លោក Antony Blinken បានចេញដំណើរកាលពីថ្ងៃអង្គារ សម្រាប់ដំណើរកម្សាន្តពហុប្រទេស ដែលចំណតទីមួយ គឺទីក្រុងប្រ៊ុចសែល ជាកន្លែងដែលលោកត្រូវបានគេរំពឹងថា នឹងផ្តល់ការធានាឡើងវិញដល់សម្ព័ន្ធមិត្តអឺរ៉ុប លើការគាំទ្ររបស់សហរដ្ឋអាមេរិក សម្រាប់អ៊ុយក្រែននាពេលខាងមុខ នៅមុនអាណត្តិទីពីររបស់ ប្រធានាធិបតីជាប់ឆ្នោតលោក ដូណាល់ ត្រាំ។
យោងតាមសេចក្តីថ្លែងការណ៍ របស់ក្រសួងការបរទេស លោក Blinken នឹងនៅទីក្រុងប្រ៊ុចសែល ជាកន្លែងដែលអង្គការសន្ធិសញ្ញាអាត្លង់ទិកខាងជើង (ណាតូ) និងសហភាពអឺរ៉ុប មានទីស្នាក់ការនៅទីនោះ សម្រាប់កិច្ចប្រជុំជាមួយសមភាគីណាតូ និងសហភាពអឺរ៉ុប ដើម្បីពិភាក្សាអំពីការគាំទ្រ សម្រាប់អ៊ុយក្រែនក្នុងការការពារប្រឆាំងនឹងរុស្ស៊ី ។
ដំណើរទស្សនកិច្ចនេះកើតឡើងក្នុងថ្ងៃដែលលោក Blinken ក្លាយជារដ្ឋមន្រ្តីការទេស ហើយដូចដែលលោក ត្រាំ ត្រូវបានរាយការណ៍ថា បានជ្រើសរើសសមាជិកព្រឹទ្ធសភារដ្ឋ Florida លោក Marco Rubio ជាអ្នកការទូតកំពូលរបស់ប្រទេស។ ក្នុងចំណោមភារកិច្ចរបស់លោក Rubio ក្នុងនាមជារដ្ឋមន្រ្តីការបរទេសបន្ទាប់នឹង ត្រូវបំពេញតាមការសន្យារបស់លោក ត្រាំ ក្នុងការដោះស្រាយភ្លាមៗ ដើម្បីបញ្ចប់ជម្លោះរុស្ស៊ី និងអ៊ុយក្រែន។
លោក ដូណាល់ ត្រាំ បានប្តេជ្ញាថា នឹងបញ្ចប់ជម្លោះក្នុងរយៈពេល ២៤ ម៉ោងបន្ទាប់ពីការចូលកាន់តំណែង ប៉ុន្តែថាតើលោកនឹងសម្រេចបាន ដោយរបៀបណានោះ ហើយវានៅតែត្រូវបានតាមមើល យ៉ាងដិតដល់ពីមនុស្សម្នា នៅទូទាំងពិភពលោក នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ប្រធានាធិបតីជាប់ឆ្នោត តាមសេចក្តីរាយការណ៍បានទូរស័ព្ទ ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃពុធ ភ្លាមៗបន្ទាប់ពីលោក បានឈ្នះការបោះឆ្នោតប្រធានាធិបតី ក្នុងអំឡុងពេលដែលលោកបានចោទប្រកាន់ថា បានប្រាប់មេដឹកនាំរុស្ស៊ី កុំឱ្យធ្វើឱ្យស្ថានការណ៍នៅអ៊ុយក្រែន កើនឡើង ប៉ុន្ដែវិមានក្រឹមឡាំងបានបដិសេធ ការហៅបែបនេះទាំងស្រុង។
បន្ទាប់ពីបញ្ចប់ដំណើរទៅកាន់ប្រទេសបែលហ្ស៊ិក លោក Blinken នឹងត្រូវធ្វើដំណើរទៅកាន់ប្រទេសប៉េរូ និងប្រេស៊ីល ជាកន្លែងដែលលោកនឹងចូលរួម ជាមួយលោកប្រធានាធិបតី ចូ បៃដិន នៅក្នុងកិច្ចប្រជុំប្រចាំឆ្នាំរបស់មេដឹកនាំ កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក និងកិច្ចប្រជុំកំពូលមេដឹកនាំ ក្រុមប្រទេសទាំង ២០រៀងគ្នា៕
ប្រែសម្រួល ឈូក បូរ៉ា
