បរទេស៖ យោងតាមការចេញផ្សាយរបស់ RT អនុរដ្ឋមន្ត្រីការបរទេសរុស្ស៊ី លោក Aleksandr Pankin បាននិយាយកាលពីថ្ងៃសុក្រថា ប្រទេសឥណ្ឌូណេស៊ីបានទទួលឋានៈជាដៃគូថ្មីពីសំណាក់ក្រុមសេដ្ឋកិច្ច BRICS ហើយក្នុងនោះសារព័ត៌មានរុស្ស៊ី រាយការណ៍ថា ម៉ាឡេស៊ី និងថៃ ក៏បានទទួលការចាត់តាំងនេះដែរ។
លោក Pankin បានធ្វើសេចក្តីថ្លែងការណ៍កាលពីថ្ងៃព្រហស្បតិ៍ ខណៈកំពុងថ្លែងសុន្ទរកថាក្នុងកិច្ចប្រជុំថ្នាក់រដ្ឋមន្ត្រីកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងលីម៉ា ប្រទេសប៉េរូ។
និយាយអំពីកិច្ចប្រជុំកំពូល BRICS ដែលរុស្ស៊ីធ្វើជាម្ចាស់ផ្ទះនៅទីក្រុង Kazan កាលពីខែមុន លោក Pankin បាននិយាយថាខ្លួនបានបង្ហាញពីបំណងប្រាថ្នារបស់មនុស្សភាគច្រើនលើពិភពលោកក្នុងការបង្កើតសណ្តាប់ធ្នាប់ពិភពលោកដ៏ត្រឹមត្រូវ អនុវត្តកំណែទម្រង់ស្ថាប័នអន្តរជាតិ និងកសាងទំនាក់ទំនងសេដ្ឋកិច្ចប្រកបដោយសមធម៌។
អនុរដ្ឋមន្ត្រីការបរទេសដដែលបាននិយាយថា មានកិច្ចការងារជាច្រើនដែលសុទ្ធតែគួរឱ្យចាប់អារម្មណ៍ នៃកិច្ចព្រមព្រៀងស្តីពីពាណិជ្ជកម្ម រួមមានទាំងការវិនិយោគ បញ្ញាសិប្បនិមិត្ត ថាមពល និងអាកាសធាតុ ក៏ដូចជាភស្តុភារត្រូវបានធ្វើឡើងក្នុងអំឡុងពេលកិច្ចប្រជុំកំពូល។ លោកបាននិយាយថា៖ ប្រទេសឥណ្ឌូនេស៊ីដែលជារដ្ឋសមាជិក APEC បានក្លាយជាប្រទេសដៃគូ BRICS ជាផ្លូវការ។
គួរឲ្យដឹងដែរថាឋានៈ’ប្រទេសដៃគូ’ ថ្មីត្រូវបានអនុម័តនៅក្នុងកិច្ចប្រជុំ Kazan ហើយមានបំណងបម្រើជាជម្រើសមួយសម្រាប់សមាជិកភាពបន្ទាប់ពីប្រទេសជាង ៣០ ទៀតបានដាក់ពាក្យចូលរួមជាមួយអង្គសេដ្ឋកិច្ចដ៏ធំថ្មីនេះ៕
ប្រែសម្រួល៖ ស៊ុនលី
