បរទេស៖ ខ្សែវីដេអូបានលេចចេញឡើងបង្ហាញ ពីខ្មាន់កាំភ្លើងនៃក្រុមជីហាដ កំពុងដើរតាមសាលនានាក្នុងវិមានប្រធានាធិបតីស៊ីរី Bashar Assad ក្នុងក្រុង អាឡិបប៉ូ ។ ក្រុមបះបោរបានសម្រុកចូលទីក្រុង នៅក្នុងការវាយលុកដ៏គួរឱ្យភ្ញាក់ផ្អើល មួយកាលពីថ្ងៃព្រហស្បតិ៍។
យោងតាមសារព័ត៌មាន RT ចេញផ្សាយនៅថ្ងៃទី១ ខែធ្នូ ឆ្នាំ២០២៤ បានឱ្យដឹងថា ក្រុមភេរវករ Hayat Tahrir-al-Sham (HTS) និងកងជីវពលសម្ព័ន្ធមិត្ត បានវាយប្រហារលើទឹកដីគ្រប់គ្រងដោយ រដ្ឋាភិបាលនៅភាគខាងជើងប្រទេសស៊ីរី កាលពីថ្ងៃពុធ ដោយចូលទៅកាន់ទីក្រុងអាឡិបប៉ូ នៅថ្ងៃបន្ទាប់ ខណៈដែលយោធាស៊ីរីបានប្រមូលផ្តុំគ្នាឡើងវិញ និងបើកការវាយលុក។ គិតត្រឹមថ្ងៃសៅរ៍ ទីបញ្ជាការទូទៅស៊ីរីបានទទួលស្គាល់ថា កងទ័ពបានបាត់បង់សមាជិក សេវាកម្មរាប់សិបនាក់ ប៉ុន្តែបាននិយាយថា ក្រុមសកម្មប្រយុទ្ធរបស់ក្រុមភេរវករ HTS បានបរាជ័យក្នុងការបង្កើតទីតាំងសុវត្ថិភាព ចំពេលមានការវាយប្រហារតាមអាកាស ដោយឥតឈប់ឈរដោយ យន្តហោះចម្បាំងស៊ីរី និងរុស្ស៊ី។
វីដេអូមួយដែលត្រូវបានថត ដោយសមាជិកក្រុមភេរវករ HTS ហើយត្រូវបានចែករំលែកនៅលើ ប្រព័ន្ធផ្សព្វផ្សាយសង្គមកាលពីថ្ងៃអាទិត្យ បង្ហាញពីក្រុមសកម្មប្រយុទ្ធដែល ចូលមកក្នុងវិមានប្រធានាធិបតី ក្នុងទីក្រុងអាឡិបប៉ូ។ ពួកជីហាដអាចត្រូវបានគេមើលឃើញថា បានដើរឆ្លងកាត់បន្ទប់បរិភោគអាហារ ដែលងងឹតហើយឡើងជណ្តើរថ្មម៉ាប ដើម្បីទៅដល់ជាន់ខាងលើនៃវាំង។
វិមានប្រធានាធិបតីរបស់ស៊ីរី គឺហាក់ដូចជាមិនត្រូវបានកាន់កាប់ មុនពេលវីដេអូត្រូវបានថតនោះទេ។ ទោះបីជារដ្ឋាភិបាលស៊ីរី បានគ្រប់គ្រងទីក្រុងអាឡិបប៉ូវិញនៅឆ្នាំ ២០១៦ និងបានកាន់កាប់ទីក្រុងនេះ រហូតដល់សប្តាហ៍នេះក៏ដោយ ប៉ុន្តែលោក Assad ប្រធានាធិបតីស៊ីរី គឺប្រើប្រាស់លំនៅដ្ឋានជាច្រើន ហើយនៅពេលវីដេអូត្រូវបានថតនោះ លោកគឺកំពុងជួបជាមួយរដ្ឋមន្ត្រីការបរទេសអ៊ីរ៉ង់ Abbas Araghchi ក្នុងទីក្រុង ដាម៉ាស ចម្ងាយប្រហែល ៣៥០ គីឡូម៉ែត្រពីភាគខាងត្បូង ៕
ប្រែសម្រួលៈ ណៃ តុលា
