បរទេស៖ រដ្ឋាភិបាលថៃ បានដាក់ការតវ៉ាជាផ្លូវការជាមួយ នឹងរដ្ឋាភិបាលមីយ៉ាន់ម៉ា បន្ទាប់ពីកប៉ាល់នេសាទថៃមួយគ្រឿង ត្រូវបានរងការបាញ់ប្រហារនៅក្នុងដែនទឹក Ranong កាលពីថ្ងៃសៅរ៍។ ឧប្បត្តិហេតុនេះនាំឱ្យមានការរឹបអូសទូកមួយគ្រឿង ក្នុងចំណោមក្រុមនាវិកដែលក្នុងនោះមាន ៤នាក់ជាជនជាតិថៃ ។
យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយនៅថ្ងៃទី២ ខែធ្នូ ឆ្នាំ២០២៤ បានឱ្យដឹងថា ក្នុងអំឡុងពេលធ្វើដំណើរ ទៅគណៈរដ្ឋមន្ត្រីចល័តទៅកាន់ខេត្តឈៀងរ៉ៃ កាលពីថ្ងៃអាទិត្យ នាយករដ្ឋមន្ត្រីថៃ លោកស្រី ផែតងតាន ស៊ីណាវ៉ាត្រា (Paetongtarn Shinawatra) បាននិយាយថា រដ្ឋាភិបាលប្រឆាំងទៅនឹង ការប្រើប្រាស់អំពើហិង្សា ហើយកំពុងរង់ចាំលទ្ធផលនៃ ការស៊ើបអង្កេតលើឧប្បត្តិហេតុនេះ។
រដ្ឋមន្ត្រីក្រសួងការពារជាតិ ថៃ លោក Phumtham Wechayachai បាននិយាយថា មន្ត្រីថៃនៅគណៈកម្មាធិការ ព្រំដែនថៃ-មីយ៉ាន់ម៉ា បានផ្ញើលិខិតមួយដើម្បីតវ៉ាប្រឆាំងនឹង ការវាយប្រហារនេះ ហើយសុំឱ្យមីយ៉ាន់ម៉ា ប្រគល់ទូកដែលរឹបអូសបាន និងនាវិកថៃមកវិញ។
ចំណែករដ្ឋមន្ត្រីក្រសួងការបរទេសថៃលោក Maris Sangiampongsa បាននិយាយថា លោកនឹងកោះហៅឯកអគ្គរដ្ឋទូតមីយ៉ាន់ម៉ា ប្រចាំប្រទេសថៃ ដើម្បីពិភាក្សាអំពីបញ្ហានេះ និងទាមទារឱ្យមានការដោះលែង នាវិកថៃនៅថ្ងៃចន្ទនេះ។ លោកថា ជនជាតិថៃទាំង ៤នាក់នោះមានសុវត្ថិភាព និងមានស្ថានភាពល្អ ។
ឧត្តមសេនីយទោ Thanathip Sawangsaeng អ្នកនាំពាក្យក្រសួងការពារជាតិកាលពីថ្ងៃអាទិត្យ បានបញ្ជាក់ថា លោក Phumtham បានបញ្ជាឱ្យមន្ត្រីថៃនៅក្នុង TBC ដើម្បីចរចាដោះលែងនាវិកថៃទាំង ៤នាក់ និងការបញ្ជូនទូកនេសាទមកវិញ ឱ្យបានឆាប់តាមដែលអាចធ្វើទៅបាន។
ជនជាតិថៃទាំង៤នាក់ ស្ថិតក្នុងចំណោមសមាជិកនាវិក ៣១នាក់ នៅលើទូកនេសាទ Sor Charoenchai 8 ដែលត្រូវបានចាប់ខ្លួនដោយ ប្រទេសមីយ៉ាន់ម៉ា បន្ទាប់ពីឧប្បត្តិហេតុកាលពីថ្ងៃសៅរ៍។
ឧត្តមសេនីយទោ Thanathip បានបន្តថា ក្នុងអំឡុងពេលនៃការវាយប្រហារ សមាជិកនាវិកនៃទូកនេសាទថៃម្នាក់ បានលោតចូលសមុទ្រ ហើយលង់ទឹក។ មជ្ឈមណ្ឌលបញ្ជាការអនុវត្តន៍ ដែនសមុទ្រថៃបាននិយាយថា ទូកនេសាទថៃកំពុងនេសាទនៅចម្ងាយ ២០ គីឡូម៉ែត្រភាគខាងលិចនៃកោះ Phayam នៅពេលដែលពួកគេត្រូវបានខិតជិត ដោយនាវាល្បាតមីយ៉ាន់ម៉ាចំនួន ៣គ្រឿង ដែលភ្លាមៗនោះបានបាញ់ប្រហារមកលើពួកគេ ៕
ប្រែសម្រួលៈ ណៃ តុលា
