កូឡាឡាំពួរ៖ អាជ្ញាធរម៉ាឡេស៊ី និងថៃឡង់ដ៏ កំពុងប្រឈមមុខនឹងរលកទី២នៃព្យុះភ្លៀងដែលធ្លាក់ចុះយ៉ាងខ្លាំង និងគ្រោះទឹកជំនន់ដែលអាចកើតមានក្នុងសប្តាហ៍នេះ ។
អាជ្ញាធរបានឲ្យដឹងថា ទោះបីជាអ្នកផ្លាស់ទីលំនៅមួយ ចំនួនអាចត្រឡប់ទៅផ្ទះវិញ បានក៏ដោយ ហើយគ្រោះទឹកជំនន់ដ៏អាក្រក់បំផុត ក្នុងរយៈពេលជាច្រើនទស្សវត្សរ៍ បានចាប់ផ្តើមស្រកនៅតំបន់ខ្លះក្តី ។
គិតចាប់តាំងពីសប្តាហ៍មុន មានមនុស្សចំនួន ២៧នាក់បានស្លាប់ និងជាងកន្លះលានគ្រួសារ នៅក្នុងបណ្តាប្រទេសនៅក្នុងតំបន់អាស៊ីអាគ្នេយ៍ ជិតខាងគ្នានេះ បានរងការវាយប្រហារដោយភ្លៀងធ្លាក់ចុះយ៉ាងខ្លាំង និងគ្រោះទឹកជំនន់ ដែលអាជ្ញាធរលើកឡើងថា បានកើតឡើងធ្ងន់ធ្ងរបំផុត ក្នុងរយៈពេលជាច្រើនទសវត្សរ៍មកនេះ ។
ស្ថានភាពបន្ទាន់ៗ បានប្រសើរឡើង នៅក្នុងតំបន់មួយចំនួន ហើយកម្រិតទឹកបានស្រកចុះដែរ នេះបើយោងតាមទិន្នន័យ របស់រដ្ឋាភិបាលបានប្រកាសឲ្យដឹងនៅថ្ងៃចន្ទនេះ ។
គេហទំព័ររបស់ទីភ្នាក់ងារ គ្រប់គ្រងគ្រោះមហន្តរាយ បានបង្ហាញថា នៅក្នុងប្រទេសម៉ាឡេស៊ី ចំនួនមនុស្សនៅក្នុងជំរកជម្លៀស បានថយចុះមកនៅត្រឹមប្រហែល១២៨.០០០នាក់ ដែលពីមុនមានរហូតដល់ ១៥២.០០០នាក់កាលពីថ្ងៃអាទិត្យ ៕
ប្រែសម្រួលដោយ៖ ម៉ៅ បុប្ផាមករា
