បរទេស ៖ យោងតាមការចេញផ្សាយរបស់ RT ក្រុមហាម៉ាស់បានធ្វើការប្រកាសអបអរសាទរ ជាមួយនឹងប្រជាជនស៊ីរី បន្ទាប់ពីកងកម្លាំងប្រដាប់អាវុធក្នុងប្រទេសនេះបានផ្តួលរំលំរដ្ឋាភិបាល និងបណ្តេញអតីតប្រធានាធិបតី Bashar Assad កាលពីចុងសប្តាហ៍នេះ។
នៅក្នុងសេចក្តីថ្លែងការណ៍មួយដែលត្រូវបានចែករំលែកនៅលើបណ្តាញ Telegram របស់ក្រុមសកម្មប្រយុទ្ធប៉ាឡេស្ទីន ក្រុមហាម៉ាស់បានអំពាវនាវដល់ប្រជាជនស៊ីរីឱ្យ រួបរួមសម្ព័ន្ធភាពរបស់ពួកគេ ការរួបរួមជាតិបន្ថែមទៀត និងក្រោកឡើងពីលើការឈឺចាប់ពីអតីតកាល។
ក្រុមសកម្មប្រយុទ្ធបានសរសេរថាយើងសូមអបអរសាទរដល់ប្រជាជនស៊ីរីជាបងប្អូនចំពោះជោគជ័យរបស់ពួកគេក្នុងការសម្រេចបាននូវសេចក្តីប្រាថ្នារបស់ពួកគេសម្រាប់សេរីភាព និងយុត្តិធម៌ ដោយបន្ថែមថាវាគោរពឆន្ទៈ ឯករាជ្យភាព និងជម្រើសនយោបាយរបស់ប្រជាជនស៊ីរី។
នៅក្នុងសេចក្តីថ្លែងការណ៍ដាច់ដោយឡែកមួយ លោក Ziad al-Nakhala ប្រធានក្រុមជីហាតអ៊ីស្លាមប៉ាឡេស្ទីន ដែលជាសម្ព័ន្ធមិត្តរបស់ហាម៉ាស បានបន្ទរពីក្តីរីករាយរបស់គាត់ ហើយបាននិយាយថា ក្រុមរបស់គាត់សង្ឃឹមថា ស៊ីរីនឹងនៅតែជាអ្នកគាំទ្រប្រជាជនប៉ាឡេស្ទីន និងបុព្វហេតុរបស់ពួកគេ។
គួរឲ្យដឹងដែរថាចាប់តាំងពីពេលរដ្ឋប្រហារជោគជ័យនោះមក ទាំងមេដឹកនាំស៊ីរីលោក Assad និងក្រុមគ្រួសាររបស់គាត់ បានទទួលសិទ្ធិជ្រកកោន ហើយបច្ចុប្បន្នកំពុងស្ថិតនៅក្នុងទីក្រុងមូស្គូ ហើយគេជឿជាក់ថាគាត់ត្រូវបានអញ្ជើញពីសំណាក់ប្រធានាធិបតីរុស្ស៊ីគឺលោក Vladimir Putin ដោយផ្ទាល់ទៀតផង៕
ប្រែសម្រួល៖ស៊ុនលី
