បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយ កាលពីថ្ងៃព្រហស្បតិ៍ថា ទីក្រុងមូស្គូមិនប្រញាប់ប្រញាល់ ក្នុងការប្រើអាវុធល្បឿនលឿន បំផុតរបស់ខ្លួននោះទេ ប៉ុន្តែក៏នឹងមិនស្ទាក់ស្ទើរ ក្នុងការធ្វើដូច្នេះដែរ ប្រសិនបើចាំបាច់។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែធ្នូ ឆ្នាំ២០២៤ បានឱ្យដឹងថា ប្រព័ន្ធមីស៊ីលផ្លោងរយៈចម្ងាយមធ្យម ដែលមានឈ្មោះថា Oreshnik ត្រូវបានធ្វើតេស្តសាកល្បង លើកដំបូងកាលពីខែមុន ក្នុងការវាយប្រហារប្រឆាំង នឹងរោងចក្រយោធា អ៊ុយក្រែនក្នុងទីក្រុង Dnepr ។ យោធារុស្ស៊ី បាននិយាយថា គ្រាប់ផ្លោង Oreshniks នឹងមានថាមពល ខ្លាំង ជាងការវាយប្រហារ នុយក្លេអ៊ែរ តាមបែបយុទ្ធសាស្ត្រ និងដោយគ្មានការធ្លាក់វិទ្យុសកម្ម ។ នេះបើតាមយោធារុស្ស៊ី បាននិយាយ ។
លោក ពូទីន បានប្រាប់អ្នកយកព័ត៌មាន កាលពីថ្ងៃព្រហស្បតិ៍ បន្ទាប់ពីកិច្ចប្រជុំ នៃក្រុមប្រឹក្សាសេដ្ឋកិច្ចកំពូល Eurasian នៅទីក្រុង St. Petersburg ថា “យើងមិនទាន់ មានប្រព័ន្ធ Oreshnik ទាំងនេះច្រើននៅឡើយទេ ប៉ុន្តែយើងមាន មួយចំនួនហើយ” ។
ប្រធានាធិបតីរុស្ស៊ី បានបន្ថែមថា មីស៊ីលទាំងនោះ បានចូលផលិតកម្ម ជាសៀរៀលរួចហើយ។ លោក ពូទីន ប្រធានាធិបតីរុស្ស៊ី បាននិយាយទៀតថា Oreshniks មួយចំនួនពិតជានឹងត្រូវដាក់ពង្រាយនៅក្នុងប្រទេសបេឡារុស្ស ដោយបញ្ជាក់ពីសេចក្តីថ្លែងការណ៍ របស់សហសេវិក បេឡារុសលោក Alexander Lukashenko ៕
ប្រែសម្រួលៈ ណៃ តុលា
