ញូវយ៉ក៖ កាសែត The Wall Street កាសែត (WSJ) បានរាយការណ៍ថា ការស្វែងរករថយន្តដែលមាន តម្លៃសមរម្យនៅក្នុងសហរដ្ឋអាមេរិក បានក្លាយទៅជាបញ្ហាប្រឈមសម្រាប់ ប្រជាជនអាមេរិកជាច្រើន ដែលមានបញ្ហាថវិការួចហើយ ខណៈដែលពន្ធនាំចូលថ្មីលើរថយន្ត ដែលផលិតដោយម៉ិកស៊ិកគម្រាម ធ្វើឱ្យបញ្ហាកាន់តែធ្ងន់ធ្ងរឡើង។
សព្វថ្ងៃនេះ ជិតមួយភាគបីនៃរថយន្តទាំងអស់ ដែលមានតម្លៃក្រោម ៣ម៉ឺន ដុល្លារអាមេរិក និងលក់នៅសហរដ្ឋអាមេរិកត្រូវបាន សាងសង់ក្នុងប្រទេសម៉ិកស៊ិក រួមទាំងរថយន្ត Nissan Sentra, Ford Maverick និងយីហោពេញនិយមផ្សេងទៀត នេះបើយោងតាមការវិភាគ របស់គេហទំព័រលក់រថយន្ត Edmunds ហើយទិន្នន័យរបស់ក្រុមហ៊ុន បង្ហាញកាលពីមួយទសវត្សរ៍មុន ម៉ិកស៊ិក ជាអ្នកចែកចាយរថយន្ត ដែលមានតម្លៃសមរម្យមួយភាគប្រាំ ដែលលក់នៅសហរដ្ឋអាមេរិក។
របាយការណ៍នោះបានកត់សម្គាល់ថា “ប្រទេសជាប់ព្រំដែន គឺជាប្រទេសដែលឈានមុខគេជាយូរមកហើយ សម្រាប់ក្រុមហ៊ុនផលិតរថយន្តដែលសម្លឹងរកការបង្រ្កាបការចំណាយដ៏ច្រើននៃការផលិតរថយន្ត ជាពិសេសលើម៉ូដែលតូចៗ ដែលលក់ក្នុងតម្លៃទាប និងមានប្រាក់ចំណេញតិចជាងរថយន្តដឹកទំនិញធំៗ និងរថយន្ត SUV”។
របាយការណ៍បានឲ្យដឹងថា ប្រធានាធិបតីជាប់ឆ្នោតលោក ដូណាល់ ត្រាំ បានគំរាមថានឹងបន្តយុទ្ធសាស្រ្តនេះដោយសន្យាក្នុងខែវិច្ឆិកា ដើម្បីដាក់ពន្ធ ២៥ ភាគរយពីម៉ិកស៊ិក និងកាណាដា ដែលជាវិធានការមួយ ដែលអាចមានន័យថា ការលុបចោលកិច្ចព្រមព្រៀងពាណិជ្ជកម្មសេរី ដែលលោកបានចរចានៅក្នុង អាណត្តិដំបូងរបស់លោក។
របាយការណ៍នេះ បានដកស្រង់សម្តីអ្នកវិភាគថា “រាល់ការចំណាយទាក់ទងនឹងពន្ធថ្មី ទំនងជាត្រូវបានបញ្ជូនទៅអ្នកប្រើប្រាស់ យ៉ាងហោចណាស់ក្នុងរយៈពេលដ៏ខ្លីខាងមុខនេះ ហើយនឹងប៉ះពាល់ដល់រថយន្ត ដែលមានតម្លៃសមរម្យ និងរថយន្ត SUV ” ។ ម៉ូដែលតម្លៃទាប និងគ្រឿងបន្លាស់រថយន្ត ដែលផលិតនៅក្នុងប្រទេសជិតខាងទាំងពីរ នឹងត្រូវបង់ពន្ធបន្ថែមលើពាណិជ្ជកម្មថ្មី ដែលជំរុញឱ្យថ្លៃដើមកើនឡើងបន្ថែមទៀត សម្រាប់ក្រុមហ៊ុនផលិត និងអ្នកប្រើប្រាស់ ៕
