បរទេស៖ ចៅក្រមក្រុងញូវយ៉ក លោក Juan Merchan បាននិយាយថា លោកនឹងប្រកាសសាលក្រមលោក Trump នៅថ្ងៃទី ១០ ខែមករា ពោលគឺរយៈពេល ១០ ថ្ងៃមុនពេលលោកត្រឡប់ទៅសេតវិមានវិញ។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៤ ខែមករា ឆ្នាំ២០២៤ បានឱ្យដឹងថា ចៅក្រម Juan Merchan បាននិយាយកាលពីថ្ងៃទី ៣ ខែមករាថា ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump អាចបង្ហាញខ្លួនដោយផ្ទាល់ ឬតាមអ៊ីនធឺណិត នៅពេលដែលតុលាការទីក្រុងញូវយ៉ក ប្រកាសសាលក្រមលោកនៅថ្ងៃទី១០ ខែមករា ពីបទក្លែងបន្លំកំណត់ត្រាអាជីវកម្ម ដើម្បីបង់ប្រាក់ឱ្យតារាសិច នាង Stormy Daniels ។
នៅក្នុងសេចក្តីសម្រេចដែលមាន ១៨ ទំព័រ ចៅក្រម Merchan បានតម្កល់សេចក្តីសម្រេចរបស់គណៈវិនិច្ឆ័យទីក្រុងញូវយ៉កមុន ដោយបានរកឃើញថា លោក Trump មានកំហុសលើការក្លែងបន្លំកំណត់ត្រាអាជីវកម្មចំនួន ៣៤ ដើម្បីបង់ប្រាក់បិទបាំងព័ត៌មានមិនអំណោយផលក្នុងអំឡុងពេលយុទ្ធនាការបោះឆ្នោតឆ្នាំ ២០១៦ របស់លោក ដែលទាក់ទងនឹងទំនាក់ទំនងស្នេហាជាមួយតារាសិច Daniels ។
ចៅក្រមនៅទីក្រុងញូវយ៉កបាននិយាយថា លោកនឹងមានទំនោរក្នុងការផ្តល់ឱ្យប្រធានាធិបតីជាប់ឆ្នោត Trump នូវការកាត់ទោសដោយសេរី និងគ្មានការរំខាន ប៉ុន្តែការផ្លាស់ប្តូរនេះក៏នឹងធ្វើឱ្យ Trump ក្លាយជាមនុស្សដំបូងគេដែលបម្រើការជាប្រធានាធិបតីអាមេរិក ខណៈពេលដែលត្រូវបានកាត់ទោសពីបទឧក្រិដ្ឋ។
ក្រុមរបស់លោក Trump នឹងដាក់បណ្តឹងឧទ្ធរណ៍ ដែលជាវិធានការមួយដែលអាចពន្យារពេលការកាត់ទោស។
លោក Steven Cheung អ្នកនាំពាក្យរបស់លោក Trump បាននិយាយថា ចៅក្រម Merchan មិនគួរកាត់ទោសប្រធានាធិបតីជាប់ឆ្នោតនោះទេ ដោយចោទថា ការសម្រេចរបស់ចៅក្រមបានរំលោភលើអភ័យឯកសិទ្ធិប្រធានាធិបតី៕
ប្រែសម្រួលៈ ណៃ តុលា
