ប៊ែរឡាំង៖ កិច្ចប្រជុំលើកទី២៥ នៃក្រុមទំនាក់ទំនងការពារជាតិអ៊ុយក្រែន បានកោះប្រជុំកាលពីថ្ងៃព្រហស្បតិ៍ នៅឯមូលដ្ឋានទ័ពអាកាសអាមេរិកនៅទីក្រុង Ramstein ប្រទេសអាល្លឺម៉ង់ ប្រឆាំងនឹងភាពមិនច្បាស់លាស់ ខណៈដែលអ្នកចូលរួមបានសម្តែងការព្រួយបារម្ភអំពីការផ្លាស់ប្តូរសក្តានុពលនៅក្នុងគោលនយោបាយរបស់សហរដ្ឋអាមេរិក ជាមួយនឹងការសម្ពោធនាពេលខាងមុខ របស់ប្រធានាធិបតីជាប់ឆ្នោតអាមេរិកលោក ដូណាល់ ត្រាំ។
រដ្ឋមន្ត្រីការពារជាតិអាមេរិក លោក Lloyd Austin ដែលធ្វើជាម្ចាស់ផ្ទះនៃកិច្ចប្រជុំជាលើកចុងក្រោយក្នុងនាមរដ្ឋបាលរបស់ប្រធានាធិបតី Joe Biden ដែលផុតអាណត្តិបានប្រកាសកញ្ចប់ជំនួយថ្មីចំនួន ៥០០ លានដុល្លារសម្រាប់អ៊ុយក្រែន។ កញ្ចប់នោះរួមមានកាំជ្រួចបន្ថែមសម្រាប់ការពារដែនអាកាស គ្រាប់រំសេវ គ្រាប់បែកពីអាកាសទៅដី និងឧបករណ៍យោធាផ្សេងទៀត។
អ្នកចូលរួមសំខាន់ៗរួមទាំងលោក Austin និងរដ្ឋមន្ត្រីការពារជាតិអាល្លឺម៉ង់លោក Boris Pistorius បានសង្កត់ធ្ងន់លើសារៈសំខាន់នៃទម្រង់ Ramstein ទោះជាយ៉ាងណាក៏ដោយលោក Pistorius បានទទួលស្គាល់បញ្ហាប្រឈមដែលកើតឡើងដោយការផ្លាស់ប្តូរនាពេលខាងមុខនៅក្នុងភាពជាអ្នកដឹកនាំរបស់សហរដ្ឋអាមេរិក។
ដោយសង្កត់ធ្ងន់លើទំនួលខុសត្រូវរបស់អឺរ៉ុបក្នុងការរក្សាការបន្តនៅប៉ុន្មានខែខាងមុខ លោក Pistorius បានគូសបញ្ជាក់ពីចេតនារបស់លោក ក្នុងការលើកកំពស់ក្របខ័ណ្ឌ Ramstein បន្ទាប់ពីលោក ត្រាំ ចូលកាន់តំណែង នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក ត្រាំ បានបង្ហាញពីចេតនាដោះស្រាយបញ្ហាជម្លោះអ៊ុយក្រែន-រុស្ស៊ី ក្នុងរយៈពេល ៦ខែបន្ទាប់ពីការឡើងកាន់តំណែងជាប្រធានាធិបតី។ ខុសពីរដ្ឋាភិបាលអាមេរិកបច្ចុប្បន្ន លោកបានសម្តែងការអាណិតអាសូរ ចំពោះជំហររបស់រុស្ស៊ីដែលថា អ៊ុយក្រែនមិនគួរចូលរួមជាមួយអង្គការណាតូ ហើយជំហររបស់លោកបានបង្កើនការព្រួយបារម្ភក្នុងចំណោមអ្នកគាំទ្រអ៊ុយក្រែន ដែលថាជំនួបនៅថ្ងៃព្រហស្បតិ៍អាចជាជំនួបលើកចុងក្រោយ។
ដោយកត់សម្គាល់ថាអនាគតរបស់កិច្ចប្រជុំ Ramstein មិនត្រូវបានធានានោះទេ លោក Pistorius បានលើកឡើងថា ប្រសិនបើរដ្ឋាភិបាលថ្មីរបស់សហរដ្ឋអាមេរិក ចាកចេញពីកិច្ចប្រជុំនោះ ទម្រង់ផ្សេងគ្នាគួរតែបន្តកិច្ចខិតខំប្រឹងប្រែងនេះ។ ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី ដែលបានចូលរួមក្នុងកិច្ចប្រជុំនោះដែរបានជំរុញឱ្យបន្តការគាំទ្រដល់អ៊ុយក្រែន៕
ប្រែសម្រួល ឈូក បូរ៉ា
