បរទេស៖ នាយករដ្ឋមន្រ្តីស្លូវ៉ាគីលោក Robert Fico បានឲ្យដឹងថា ប្រទេសរុស្ស៊ី នឹងគោរពការប្តេជ្ញាចិត្តរបស់ខ្លួនក្នុ ងការផ្តល់ឧស្ម័នធម្មជាតិដល់ស្លូវ៉ាគីក្នុ ងរយៈពេលប៉ុន្មានខែខាងមុខ ក្រោយកិច្ចព្រមព្រៀងដឹកជញ្ជូនតាមរយៈអ៊ុយក្រែន បានផុតកំណត់ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ថ្លែងនៅលើបណ្តាញព័ត៌មាន TA3 នាយករដ្ឋមន្រ្តីស្លូវ៉ាគីលោក Fico បានបញ្ជាក់ថា បន្ទាប់ពីការផ្អាកការដឹកជញ្ជូនឧស្ម័នរុស្ស៊ីឆ្លងកាត់អ៊ុយក្រែនទៅស្លូវ៉ាគីនៅថ្ងៃទី ០១ ខែមករា ឆ្នាំ ២០២៥ ផ្លូវជំនួស រួមទាំងបំពង់បង្ហូរប្រេងតាមរយៈប្រទេសហុងគ្រី អាចត្រូវបានប្រើប្រាស់ ដើម្បីធានាការផ្គត់ផ្គង់បន្ត។ លោកបានលើកឡើងថា ប្រទេសស្លូវ៉ាគី គ្រោងនឹងទទួលឧស្ម័នចន្លោះពី ៣ ពាន់លាន ទៅ ៣,៥ ពាន់លានម៉ែត្រគូប ដែលប្រហាក់ប្រហែលនឹងបរិមាណ ដែលបាននាំចូលពីប្រទេសរុស្ស៊ី តាមរយៈអ៊ុយក្រែនក្នុងមួយឆ្នាំៗ។
ការផ្អាកការដឹកជញ្ជូននេះ ធ្វើឡើងបន្ទាប់ពីការផុតកំណត់នៃកិច្ចសន្យាឧស្ម័នរវាងអ៊ុយក្រែន និងរុស្ស៊ី កាលពីថ្ងៃទី៣១ ខែធ្នូ ដែលប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានសម្រេចចិត្តមិនបន្ត ដែលជាលទ្ធផលលំហូរឧស្ម័នទៅកាន់ប្រទេសស្លូវ៉ាគី ត្រូវបានឈប់នៅថ្ងៃទី០១ ខែមករា។
ទោះបីជាមានការធានានូវការផ្ទុកឧស្ម័នគ្រប់គ្រាន់សម្រាប់រយៈពេលខ្លីក៏ដោយ ក៏ស្លូវ៉ាគីនៅតែប្រឈមមុខនឹងបញ្ហា។ Fico បាននិយាយថាប្រទេសនេះប្រថុយនឹងការបាត់បង់ ៥០០ លានអឺរ៉ូ (ប្រហែល ៥១០ លានដុល្លារអាមេរិក) នៅក្នុងថ្លៃដឹកជញ្ជូនឧស្ម័ន ដែលរកបានពីមុនសម្រាប់ការដឹកជញ្ជូនឧស្ម័នពីរុស្ស៊ី ឆ្លងកាត់អ៊ុយក្រែន ទៅកាន់ប្រទេសអឺរ៉ុបផ្សេងទៀត។ បន្ថែមពីលើនេះ ការផ្អាកនេះត្រូវបានគេរំពឹងថានឹងជំរុញឱ្យតម្លៃឧស្ម័នកើនឡើង និងធ្វើឱ្យកង្វះការផ្គត់ផ្គង់កាន់តែធ្ងន់ធ្ងរ។
លោក Fico ក៏បានព្រមានផងដែរថាការសម្រេចចិត្តរបស់ទីក្រុងគៀវ នឹងធ្វើឱ្យប៉ះពាល់ដល់ការប្រកួតប្រជែងរបស់សហភាពអឺរ៉ុប នៅលើឆាកពិភពលោក ដោយលើកឡើងថាតម្លៃឧស្ម័ននៅអឺរ៉ុប គឺខ្ពស់ជាង ៥ ដងរួចទៅហើយនៅសហរដ្ឋអាមេរិក។ លើសពីនេះ ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានព្រមានទៅកាន់អឺរ៉ុប អំពីពន្ធពាណិជ្ជកម្មដែលមានសក្តានុពលលើការនាំចេញរបស់អឺរ៉ុប លុះត្រាតែប្រទេសជាសមាជិកបង្កើនការទិញប្រេង និងឧស្ម័នរបស់អាមេរិក៕
