ហ្សាការតា ៖ កាលពីថ្ងៃពុធ ប្រទេសឥណ្ឌូណេស៊ី បានបង្កើនស្ថានភាពប្រកាសអាសន្នអំពីភ្នំភ្លើង Mount Ibu ដែលស្ថិតនៅខេត្ត North Maluku ភាគខាងកើតនៃប្រទេស ដល់កម្រិតខ្ពស់បំផុត បន្ទាប់ពីមានសកម្មភាពភ្នំភ្លើងកើនឡើង ។
ស្ថិតនៅរយៈកម្ពស់១.៣២៥ម៉ែត្រ ភ្នំភ្លើងនេះត្រូវបានគេរាយការណ៍មកថា បានផ្ទុះជាបន្តបន្ទាប់អស់រយៈពេល ជាច្រើនថ្ងៃមកហើយ ។
ការផ្ទុះដ៏ធំបំផុតមួយបានកើតឡើងនៅម៉ោង៧និង១១នាទីព្រឹកម៉ោងក្នុងស្រុក ដោយបានបញ្ជូនផេះភ្នំភ្លើងរហូតដល់៤គីឡូម៉ែត្រទៅលើមេឃ ។ យោងតាមមជ្ឈមណ្ឌលសម្រាប់តាមដានបន្ទុះភ្នំភ្លើង និងភូមិសាស្ត្រឧតុនិយម ហៅកាត់ (PVMBG) បានឱ្យដឹងថា ពពកពណ៌ប្រផេះក្រាស់បានរសាត់ទៅភាគខាងលិចនៃភ្នំភ្លើងនេះ ។
នៅក្នុងសេចក្តីថ្លែងការណ៍មួយ បានដាក់ថា ទីភ្នាក់ងារកាត់បន្ថយគ្រោះមហន្តរាយជាតិរបស់ប្រទេសនេះបានបញ្ជាក់ថា ខ្លួនបានសម្របសម្រួល ជាមួយអាជ្ញាធរនៅក្នុងតំបន់ និង PVMBG ដើម្បីតាមដានស្ថានភាពនៅនឹងកន្លែង ។
មជ្ឈមណ្ឌល PVMBG បានអំពាវនាវដល់សាធារណជន ឱ្យនៅឱ្យឆ្ងាយពីតំបន់គ្រោះថ្នាក់ដែលមានកាំ ៤,៥គីឡូម៉ែត្រ ។ មជ្ឈមណ្ឌលក៏បានជំរុញ ឱ្យមានការប្រុងប្រយ័ត្ន នៅក្នុងតំបន់គ្រោះថ្នាក់ដែលមានចម្ងាយ៦គីឡូម៉ែត្រនៅលើផ្នែកភាគខាងជើង ដោយសារតែការកើនឡើង នូវលទ្ធភាពនៃការផ្ទុះភ្នំភ្លើងភ្លាមៗ និងបង្កជាគ្រោះថ្នាក់ ៕
ប្រែសម្រួលដោយ៖ ម៉ៅ បុប្ផាមករា
