បរទេស៖ TikTok បាននិយាយកាលពីថ្ងៃអាទិត្យថា ខ្លួនកំពុងស្ដារសេវាកម្មដល់ អ្នកប្រើប្រាស់នៅសហរដ្ឋអាមេរិក បន្ទាប់ពីវេទិកាចែករំលែកវីដេអូ ដ៏ពេញនិយមមួយនេះ ត្រូវបានបញ្ឈប់ជាការឆ្លើយតបទៅនឹង ការហាមឃាត់របស់សហព័ន្ធ ដែលប្រធានាធិបតីជាប់ឆ្នោត Donald Trump បាននិយាយថា លោកនឹងព្យាយាមផ្អាកដោយបទបញ្ជាប្រតិបត្តិ នៅថ្ងៃដំបូងរបស់លោកនៅក្នុងតំណែង។
យោងតាមសារព័ត៌មាន VOA ចេញផ្សាយនៅថ្ងៃទី១៩ ខែមករា ឆ្នាំ២០២៥ បានឱ្យដឹងថា លោក Trump បាននិយាយថាលោកគ្រោងនឹង ចេញបញ្ជាដើម្បីផ្តល់ឱ្យក្រុមហ៊ុនមេ ដែលមានមូលដ្ឋាននៅប្រទេសចិនរបស់ TikTok ពេលវេលាបន្ថែមទៀតដើម្បីស្វែងរក អ្នកទិញដែលត្រូវបានអនុម័ត មុនពេលវេទិកាចែករំលែកវីដេអូដ៏ពេញនិយម គឺស្ថិតនៅក្រោមការហាមឃាត់ ជាអចិន្ត្រៃយ៍របស់សហរដ្ឋអាមេរិក។ លោកបានប្រកាសបែបនេះ នៅគណនី Truth Social របស់គាត់ ខណៈដែលអ្នកប្រើប្រាស់ TikTok រាប់លាននាក់របស់សហរដ្ឋអាមេរិក បានភ្ញាក់ផ្អើលដោយដឹងថា ពួកគេមិនអាចចូលប្រើកម្មវិធី ឬវេទិកា TikTok បានទៀត។
Google និង Apple បានដកកម្មវិធីនេះចេញពី វេទិកាឌីជីថលរបស់ពួកគេ ដើម្បីអនុវត្តតាមច្បាប់ ដែលតម្រូវឱ្យពួកគេធ្វើដូច្នេះ ប្រសិនបើក្រុមហ៊ុនមេ TikTok ByteDance មិនលក់ប្រតិបត្តិការនៅសហរដ្ឋអាមេរិក ត្រឹមថ្ងៃអាទិត្យទេនោះ។ ច្បាប់ដែលបានអនុម័តដោយមានការគាំទ្រ ទ្វេភាគីយ៉ាងទូលំទូលាយក្នុងខែមេសា បានអនុញ្ញាតឱ្យមានការផាកពិន័យយ៉ាងខ្លាំង ចំពោះការមិនគោរពតាម។
ក្រុមហ៊ុនដែលដំណើរការ TikTok បាននិយាយនៅក្នុងការបង្ហោះនៅលើ X ថា ការបង្ហោះរបស់លោក Trump បានផ្តល់ “ភាពច្បាស់លាស់និងការធានា ចាំបាច់ដល់អ្នកផ្តល់សេវារបស់យើងថា ពួកគេនឹងមិនប្រឈមមុខនឹងការពិន័យដែលផ្តល់ TikTok ដល់ប្រជាជនអាមេរិកជាង ១៧០ លាននាក់” ៕
ប្រែសម្រួលៈ ណៃ តុលា
