តូក្យូ៖ នាយករដ្ឋមន្ត្រីជប៉ុនលោក Shigeru Ishiba កំពុងរៀបចំដំណើរទស្សនកិច្ចទៅកាន់សហរដ្ឋអាមេរិក សម្រាប់កិច្ចប្រជុំកំពូលដោយផ្ទាល់ជាលើកដំបូង ជាមួយប្រធានាធិបតីអាមេរិកលោក ដូណាល់ ត្រាំ នៅថ្ងៃទី០៧ ខែកុម្ភៈ។
ជប៉ុនបានរិះរកលទ្ធភាពនៃការជួបលោក Ishiba ជួបជាមួយលោក ត្រាំ មុនពេលលោកចូលកាន់តំណែងជាលើកដំបូងក្នុងខែវិច្ឆិកា និងបន្ទាប់មកក្នុងខែមករា ប៉ុន្តែវាមិនបានសម្រេចនោះទេ។ ថ្មីៗនេះ លោក Ishiba បានឲ្យដឹងថា លោកកំពុងស្វែងរក “ពេលវេលាដែលអាចធ្វើទៅបានដំបូងបំផុត” សម្រាប់កិច្ចប្រជុំកំពូលជាមួយ ប្រធានាធិបតីសហរដ្ឋអាមេរិក។
ក្នុងអំឡុងពេលនៃកិច្ចប្រជុំដែល បានគ្រោងទុកជាមួយលោក ត្រាំ ដែលបានត្រឡប់ទៅសេតវិមានវិញនៅថ្ងៃទី២០ ខែមករា លោក Ishiba ត្រូវបានគេរំពឹងថានឹងសង្កត់ធ្ងន់លើតម្រូវការ ក្នុងការពង្រឹងសម្ព័ន្ធភាពទ្វេភាគី និងបង្កើនកិច្ចសហប្រតិបត្តិការ ដើម្បីធានាបាននូវឥណ្ឌូប៉ាស៊ីហ្វិកសេរី និងបើកចំហ។
លោក Ishiba ដែលចូលកាន់តំណែងក្នុងខែតុលា ឆ្នាំ២០២៤ បានលើកឡើងថា លោកនឹងលើកឡើងពីអត្ថប្រយោជន៍ នៃទំនាក់ទំនងជប៉ុន-អាមេរិក ដ៏រឹងមាំដោយផ្អែកលើផលប្រយោជន៍ ជាតិទៅវិញទៅមក នៅពេលលោកជួបជាមួយ ត្រាំ ដែលចូលចិត្តកិច្ចព្រមព្រៀងទ្វេភាគី ជាងពហុភាគី។
ការសម្រេចចិត្តរបស់អតីតប្រធានាធិបតីលោក ចូ បៃដិន ក្នុងការរារាំងការកាន់កាប់ក្រុមហ៊ុន United States Steel Corp ដោយគូប្រជែងជប៉ុន គឺក្រុមហ៊ុន Nippon Steel Corp. នៅតែជាចំណុចនៃជម្លោះក្នុងទំនាក់ទំនងទ្វេភាគី។ លោក Ishiba អាចលើកឡើងពីបញ្ហានេះ ក្នុងអំឡុងពេលពិភាក្សាជាមួយលោក ត្រាំ។
លោក Ishiba បានជំរុញឱ្យទីក្រុងវ៉ាស៊ីនតោន ដោះស្រាយកង្វល់ក្នុងចំណោមមជ្ឈដ្ឋានធុរកិច្ច ក្នុងប្រទេសទាំងពីរដោយសង្កត់ធ្ងន់ថា បរិយាកាសដែលងាយស្រួលវិនិយោគ គឺចាំបាច់សម្រាប់ទំនាក់ទំនងសេដ្ឋកិច្ចរវាងប្រទេសទាំងពីរ ៕
ប្រែសម្រួល ឈូក បូរ៉ា
