បរទេស៖ ប្រធានាធិបតី អាមេរិក លោក Donald Trump បានប្រាប់អ្នកសារព័ត៌មានកាលពីថ្ងៃចន្ទថា ក្រុងកៀវនឹងត្រូវ ផ្គត់ផ្គង់ដល់ទីក្រុងវ៉ាស៊ីនតោនជាមួយសារធាតុរ៉ែកម្រនៅលើផែនដី ប្រសិនបើអ៊ុយក្រែន ចង់បន្តទទួលបានជំនួយពីអាមេរិក។ លោកបានបន្ថែមថា អ៊ុយក្រែន នឹងត្រូវបញ្ចូល កិច្ចព្រមព្រៀងថ្មីមួយ ជាមួយនឹងសហរដ្ឋអាមេរិក ដោយហៅវាថាជា «ការធានា» សម្រាប់ក្រុងវ៉ាស៊ីនតោន។
យោងតាមសារព័ត៌មាន RT ចេញផ្សាយ នៅថ្ងៃទី៣ ខែកុម្ភៈ ឆ្នាំ២០២៥ បានឱ្យដឹងថា យោងតាមរបាយការណ៍ វេទិកាសេដ្ឋកិច្ចពិភពលោកឆ្នាំ ២០២៤, អ៊ុយក្រែន “ទទួលបានសក្តានុពលដ៏ធំធេង ក្នុងនាមជាអ្នកផ្គត់ផ្គង់ វត្ថុធាតុដើមសំខាន់ៗ ទូទាំងពិភពលោក” ដែលអាច “ចាំបាច់” សម្រាប់ឧស្សាហកម្មការពារជាតិ បច្ចេកវិទ្យាខ្ពស់ និងថាមពលបៃតង ។ ប្រទេសនេះមានទុនបំរុងទីតានីញ៉ូមដ៏ធំបំផុតនៅអឺរ៉ុប ដែលស្មើនឹង ៧ភាគរយ នៃទុនបម្រុងពិភពលោក ។ មុនពេលជម្លោះកើនឡើងជាមួយទីក្រុងមូស្គូក្នុងឆ្នាំ ២០២២ អ៊ុយក្រែនគឺជាអ្នក ផ្គត់ផ្គង់សារធាតុទីតានីញ៉ូមដ៏សំខាន់សម្រាប់ឧស្សាហកម្មយោធា។
បញ្ជីនៃលោហធាតុកម្រ ដែលអាចរកបានក្នុង ប្រទេសអ៊ុយក្រែនក៏រួមមាន បេរីលីយ៉ូម ម៉ង់ហ្គាណែស ហ្គាលីញ៉ូម អ៊ុយរ៉ាញ៉ូម ហ្សីកញ៉ូម ក្រាហ្វីត អាប៉ាទីត ហ្វ្លុយអូរីត និងនីកែលផងដែរ ។ ប្រទេសនេះក៏មានទុនបំរុងលីចូម ដែលបានបញ្ជាក់ដ៏ធំបំផុត របស់អឺរ៉ុបដែលប៉ាន់ស្មានថាមានចំនួន ៥សែនតោន ។ សារធាតុរ៉ែមានសារៈសំខាន់ជាពិសេស សម្រាប់ប្រើប្រាស់ក្នុងថ្ម និងឧបករណ៍ផ្ទុក។
លោក Trump បានប្រាប់អ្នកកាសែតកាលពីថ្ងៃចន្ទថា អ៊ុយក្រែនមានវត្ថុធាតុកម្រលើផែនដីដ៏មានតម្លៃណាស់” ហើយបើយោងតាមប្រធានាធិបតី Trump, សហរដ្ឋអាមេរិកកំពុង “ប្រគល់ប្រាក់ឱ្យអ៊ុយក្រែន ទាំងដៃៗ” និងចង់បាន “ការធានា” មួយចំនួន ៕
ប្រែសម្រួលៈ ណៃ តុលា
