យ៉ាំងហ្គោន៖ មេដឹកនាំ នៃកងកម្លាំងប្រដាប់អាវុធ ជនជាតិភាគតិចមីយ៉ាន់ម៉ា ដែលមានទំនាក់ទំនង នឹងរបបយោធា បានឲ្យដឹងថា ជនបរទេសរាប់ពាន់នាក់រួមទាំងចិន ជប៉ុន វៀតណាម និងថៃ ត្រូវបានបង្ខំឱ្យធ្វើការឱ្យអ្នកបោកប្រាស់ ដែលមានមូលដ្ឋាននៅតំបន់ព្រំដែន ដែលស្ថិត នៅក្រោមការគ្រប់គ្រងរបស់ខ្លួន នេះបើយោងតាមការ ចុះផ្សាយរបស់ទីភ្នាក់ងារ សារព័ត៌មានក្យូដូជប៉ុន។
ថ្លែងទៅកាន់កាសែតក្យូដូ និង ប្រព័ន្ធផ្សព្វផ្សាយថៃ និងមីយ៉ាន់ម៉ាមួយចំនួននៅ Myawaddy នៅតាមព្រំដែនជាមួយ ប្រទេសថៃ លោក Saw Chit Thu កងកម្លាំងការពារព្រំដែន Karen ឬ BGF បានឲ្យដឹងថា ខ្លួនមានបំណងផ្ទេរជនជាតិចិន មួយក្រុមដែលខ្លួន បានជួយសង្គ្រោះទៅកាន់ប្រទេសចិន តាមរយៈប្រទេសថៃ នៅចុងសប្តាហ៍នេះ។
លោក Saw Chit Thu បានលើកឡើងថា BGF បានជួយសង្គ្រោះ និង ចាប់ជនបរទេសជាង ១,០០០ នាក់ ពីអ្នកបោកប្រាស់ នៅក្នុងតំបន់គ្រប់គ្រង របស់ខ្លួន ខណៈដែល BGF ដែលជាក្រុមប្រដាប់អាវុធជនជាតិភាគតិច Karen មួយក្រុមត្រូវបានចោទប្រកាន់ថា មានជាប់ពាក់ព័ន្ធក្នុងក្រុមដែលជឿថាគ្រប់គ្រងដោយជនជាតិចិន លោកលោក Saw Chit Thu បានឲ្យដឹងថា កម្លាំងបានទទួល តែការជួលដីពីអាជីវកម្ម ដែលប្រើប្រាស់តំបន់របស់ខ្លួន។
នៅក្នុងនោះដែរ BGF ធ្លាប់បានអះអាងថា ខ្លួនមិនបានដឹងពីសកម្មភាព ខុសច្បាប់ ដែលកំពុងធ្វើឡើងនៅក្នុងតំបន់នោះទេ។ សុន្ទរកថារបស់លោក Saw Chit Thu ធ្វើឡើង នៅពេលដែលជំនួយការរដ្ឋមន្ត្រីសន្តិសុខ សាធារណៈចិនលោក Liu Zhongyi កាលពីថ្ងៃចន្ទបានទៅទស្សនា កន្លែងនានាក្នុងទីក្រុង Myawaddy ជាកន្លែងដែលជនបរទេស ដែលត្រូវបានជួយសង្គ្រោះកំពុងស្នាក់នៅ ៕
ប្រែសម្រួល ឈូក បូរ៉ា
