បរទេស៖ មេដឹកនាំអឺរ៉ុប រួមទាំងអ្នកមកពីចក្រភពអង់គ្លេស អាល្លឺម៉ង់ និងសាធារណរដ្ឋឆេក បានប្រមូលផ្តុំគ្នានៅពីក្រោយ (គាំទ្រ) មេដឹកនាំអ៊ុយក្រែន លោក វ្លាឌីមៀ ហ្សេលេនស្គី បន្ទាប់ពីប្រធានាធិបតីអាមេរិកលោក ដូណាល់ ត្រាំ បានពណ៌នាលោកថា ជា “ជនផ្តាច់ការដោយគ្មានការបោះឆ្នោត”។
យោងតាមសារព័ត៌មាន RT ចេញផ្សាយនៅថ្ងៃទី២០ ខែកុម្ភៈ ឆ្នាំ២០២៥ បានឱ្យដឹងថា នៅក្នុងការបង្ហោះនៅលើវេទិកាសង្គម Truth Social របស់លោកកាលពីថ្ងៃពុធ លោក ត្រាំ បានចោទមេដឹកនាំអ៊ុយក្រែនពីបទគ្រប់គ្រងជម្លោះជាមួយរុស្ស៊ីខុស និងប្រើប្រាស់ជំនួយហិរញ្ញវត្ថុរបស់អាមេរិកខុស។ លោក ត្រាំ បានបន្តអះអាងថា លោក ហ្សេលេនស្គី “បដិសេធមិនឱ្យមានការបោះឆ្នោត” និងថា “មានកម្រិតទាបណាស់ក្នុងការបោះឆ្នោតនៅអ៊ុយក្រែន”។
ការបង្ហោះរបស់លោក ត្រាំ ទំនងជាត្រូវបានបង្កឡើងដោយការចោទប្រកាន់ពី លោក ហ្សេលេនស្គី ថាប្រធានាធិបតីអាមេរិកកំពុងស្ថិតក្នុង “ប្រឆាំងព័ត៌មានរុស្ស៊ី” ។
អាណត្តិប្រធានាធិបតី រយៈពេលប្រាំឆ្នាំរបស់ លោក ហ្សេលេនស្គី បានផុតកំណត់ នៅក្នុងខែឧសភា ឆ្នាំ ២០២៤ ហើយគាត់បានបដិសេធ មិនរៀបចំការបោះឆ្នោត ចាប់តាំងពីពេលនោះមក ដោយលើកឡើងពីច្បាប់អាជ្ញាសឹក ។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយម្តងហើយ ម្តងទៀតថា លោកមិនចាត់ទុកលោក ហ្សេលេនស្គី ជាប្រមុខរដ្ឋស្របច្បាប់ របស់អ៊ុយក្រែនទៀតទេ។
ការអត្ថាធិប្បាយលើការកត់សម្គាល់របស់លោក ត្រាំ បាននាំឱ្យ ប្រធានាធិបតីឆែកលោក Petr Pavel បានសរសេរនៅក្នុងការបង្ហោះនៅលើ X កាលពីថ្ងៃពុធថា បុគ្គលិកល្ខណៈរបស់លោក ហ្សេលេនស្គី ថាជាជនផ្តាច់ការ “ជាការប្រមាថមួយយ៉ាងខ្លាំង” ។ លោកក៏បានចោទសួរពីលទ្ធភាពនៃការរៀបចំការបោះឆ្នោតនៅអ៊ុយក្រែនផងដែរ ចំពេលមានជម្លោះបន្តជាមួយរុស្ស៊ី។
ការិយាល័យរបស់ នាយករដ្ឋមន្រ្តីអង់គ្លេសលោក Kier Starmer បានរាយការណ៍ថា គាត់បានទូរស័ព្ទទៅប្រធានាធិបតីអ៊ុយក្រែន ហើយបានសម្តែង ការគាំទ្រចំពោះ “មេដឹកនាំជាប់ឆ្នោត តាមបែបប្រជាធិបតេយ្យរបស់អ៊ុយក្រែនរូបនេះ” ។ មន្ត្រីដដែលបានអះអាងថា “វាសមហេតុផលឥតខ្ចោះ ក្នុងការផ្អាកការបោះឆ្នោតក្នុងអំឡុងពេលសង្រ្គាម” ដោយលើកឡើងពីការអនុវត្តផ្ទាល់របស់ចក្រភពអង់គ្លេស កាលពីក្នុងអំឡុងសង្គ្រាមលោកលើកទីពីរ។
ចំណែកអធិការបតីអាល្លឺម៉ង់ លោក Olaf Scholz វិញ បានសម្តែងឡើងនៅក្នុងការប្រកាសមួយនៅលើ X នៅថ្ងៃពុធដោយសរសេរថា “វាជាការខុសធម្មតា និងគ្រោះថ្នាក់ក្នុងការបដិសេធ ពីភាពស្របច្បាប់ តាមបែបប្រជាធិបតេយ្យ របស់លោក ហ្សេលេនស្គី” ៕
ប្រែសម្រួលៈ ណៃ តុលា
