បរទេស៖ យោងតាមការចេញផ្សាយរបស់ RT ប្រធានាធិបតីអាមេរិក លោក Donald Trump បានសម្រេចចិត្តបណ្តេញប្រធានអគ្គសេនាធិការចម្រុះ គឺលោកឧត្តមសេនីយ៍ Charles Brown ដែលជាមេបញ្ជាការស្បែកខ្មៅទី២ ក្នុងប្រវត្តិសាស្ត្រធ្លាប់កាន់តំណែងនេះ។
គេបានដឹងថាលោក Brown គឺជាអ្នកគាំទ្រជាសាធារណៈនូវចលនា Black Lives Matter (BLM) តាំងតែពីនៅក្នុងឆ្នាំ២០២០មកម្ល៉េះ ហើយលោកក៏ជាសមាជិកដែលតែងតាំងដោយរដ្ឋបាលរបស់លោកអតីតិប្រធានាធិបតី Joe Biden ផងដែរ។
ចាប់តាំងពីចូលកាន់តំណែងក្នុងខែមករា លោក Trump បានលុបចោលកម្មវិធីភាពចម្រុះ សមធម៌ និងការដាក់បញ្ចូល ឬហៅកាត់ថាDEIជាច្រើនរបស់រដ្ឋបាល Biden នៅទូទាំងរដ្ឋាភិបាលសហព័ន្ធ និងក្នុងវិស័យយោធា។
គណបក្សសាធារណរដ្ឋក៏បានសម្រេចជាផ្លូវការថាមានតែពីរភេទប៉ុណ្ណោះគឺមនុស្សប្រុសនិងស្រីដែលនឹងអាចត្រូវទទួលស្គាល់ដោយរដ្ឋាភិបាលអាមេរិក។
គួរឲ្យដឹងដែរថាលោក Trump បានប្រកាសពីការបណ្តេញលោក Brown នៅក្នុងការប្រកាសមួយនៅលើវេទិកាប្រព័ន្ធផ្សព្វផ្សាយសង្គម Truth របស់គាត់កាលពីថ្ងៃសុក្រ ដោយអរគុណឧត្តមសេនីយ៍ចំពោះការបម្រើការងាររបស់គាត់នាពេលកន្លងមក៕
ប្រែសម្រួល៖ ស៊ុនលី
