បរទេស៖ នាយកប្រតិបត្តិក្រុមហ៊ុន Tesla និង SpaceX លោក Elon Musk បានចោទសារព័ត៌មាន Reuters ថា “កុហក” ក្នុងការឆ្លើយតបទៅនឹងរបាយការណ៍របស់ខ្លួនដែលថា លោកគំរាមកាត់ផ្តាច់ការចូលប្រើអ៊ីនធឺណិត Starlink របស់អ៊ុយក្រែន ដើម្បីផ្តល់ឱ្យសេតវិមាននូវអានុភាពក្នុងការចរចាដែលកំពុងបន្តលើធនធានធម្មជាតិរបស់អ៊ុយក្រែន។
យោងតាមសារព័ត៌មាន RT ចេញផ្សាយនៅថ្ងៃទី២២ ខែកុម្ភៈ ឆ្នាំ២០២៥ បានឱ្យដឹងថា ទីភ្នាក់ងារ Reuters បានរាយការណ៍អំពីបញ្ហានេះកាលពីថ្ងៃសៅរ៍ដោយបានលើកឡើងពីមន្ត្រីអាមេរិកបីនាក់ដែលដឹងពីផែនការនេះ។ យោងតាម Reuters អ៊ុយក្រែនត្រូវបានគំរាមកំហែងជាមួយនឹង “ការបិទ” សេវាកម្មផ្កាយរណប Starlink របស់លោក Musk ក្នុងអំឡុងពេលកិច្ចប្រជុំរវាងមេដឹកនាំអ៊ុយក្រែន វ្លាឌីមៀ ហ្សេលេនស្គី និងបេសកជនរបស់ប្រធានាធិបតីអាមេរិក ដូណាល់ ត្រាំ លោក Keith Kellogg នៅទីក្រុង គៀវ ក្នុងសប្តាហ៍នេះ ប្រសិនបើពួកគេមិនចុះហត្ថលេខាលើកិច្ចព្រមព្រៀងស្តីពីភពកម្រជាមួយទីក្រុងវ៉ាស៊ីនតោន។
លោក Musk បានចូលទៅវេទិកាប្រព័ន្ធផ្សព្វផ្សាយសង្គម X របស់លោក នៅពេលក្រោយ ដោយបដិសេធពីផែនការបែបនេះហើយបានចោទ Reuters ថា បានប្រឌិតរឿង។
មហាសេដ្ឋីរូបនេះបានសរសេរថា “នេះជារឿងមិនពិត។ រ៉យទ័រកំពុងនិយាយកុហក។ ពួកគេស្ថិតនៅលេខពីរបន្ទាប់ពី AP (Associated Propaganda) ដែលជាកំពូលអ្នកកុហកព័ត៌មាន»៕
ប្រែសម្រួលៈ ណៃ តុលា
