រដ្ឋាភិបាលថៃ កំពុងបារម្ភចំពោះជនបរទេស ដែលត្រូវបានដោះលែង ចេញពីមជ្ឈមណ្ឌលបោកប្រាស់ នៅក្នុងប្រទេសមីយ៉ាន់ម៉ា

បរទេស៖ ឧបនាយករដ្ឋមន្រ្តីរបស់ថៃ លោក Phumtham Wechayachai បានសម្តែងការព្រួយបារម្ភអំពីការដោះលែងជនបរទេសជាច្រើននាក់ដែលអាចកើតមាន ចេញពីមជ្ឈមណ្ឌលបោកប្រាស់ដែលត្រូវបានបិទនៅ Myawaddy ក្នុងប្រទេស មីយ៉ាន់ម៉ា ។

យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២៥ ខែកុម្ភៈ ឆ្នាំ២០២៥ បានឱ្យដឹងថា លោក Phumtham Wechayachai បាននិយាយនៅថ្ងៃអង្គារថា រដ្ឋាភិបាលនឹងព្យាយាមរារាំងការចូលរបស់ពួកគេរហូតដល់ប្រទេសកំណើតរបស់ពួកគេយល់ព្រមធ្វើមាតុភូមិនិវត្តន៍ពួកគេវិញ។ ការចូលដោយខុសច្បាប់តាមរយៈការឆ្លងកាត់ព្រំដែនធម្មជាតិ (តំបន់ភ្នំ និងបឹងបួរ ទន្លេ) គឺមានការព្រួយបារម្ភជាពិសេស។

លោក Phumtham បាននិយាយថា “ចំនួនមនុស្សកំពុងតែកើនឡើងនៅក្នុងស្រុក Myawaddy។ យើងកំពុងពិចារណារឿងនេះព្រោះយើងមានការព្រួយបារម្ភអំពីការផ្ទុកមនុស្សច្រើនលើសកំណត់។ ប្រសិនបើអ្នកទទួលខុសត្រូវមិនអាចដោះស្រាយបញ្ហានេះ ហើយបោះបង់ចោល វានឹងក្លាយជាបញ្ហារបស់យើង ព្រោះមានច្រកព្រំដែនធម្មជាតិជាច្រើនកន្លែង»។

ឧបនាយករដ្ឋមន្រ្តីរបស់ថៃ លោក Phumtham Wechayachai បានឆ្លើយតបទៅនឹងរបាយការណ៍នៃមនុស្សរាប់ពាន់នាក់ដែលត្រូវបានដកចេញពីមជ្ឈមណ្ឌលបោកប្រាស់ដែលបិទនៅក្នុងប្រទេសមីយ៉ាន់ម៉ា ហើយត្រូវបានឃុំខ្លួនសម្រាប់ការពិនិត្យនៅទីក្រុង Myawaddy ដែលនៅទល់មុខស្រុក Mae Sot ក្នុងខេត្ត Tak របស់ប្រទេសថៃ។

លោកបន្តថា រដ្ឋាភិបាលកំពុងព្យាយាមរៀបចំមាតុភូមិនិវត្តន៍យ៉ាងឆាប់រហ័សនៃជនបរទេសទាំងនេះជាមួយមន្ត្រីមកពីប្រទេសរបស់ពួកគេ។ ប្រទេសថៃមិនចង់ទទួលពួកគេទេ លុះត្រាតែប្រទេសកំណើតរបស់ពួកគេរៀបចំធ្វើមាតុភូមិនិវត្តន៍ភ្លាមៗ។

លោកបន្ថែមទៀតថា រដ្ឋាភិបាលចិនស្ថិតក្នុងចំណោមអ្នកដែលសហការ។ ទោះជាយ៉ាងណា ការសម្របសម្រួលជាមួយប្រទេសនៅអាហ្វ្រិកដែលគ្មានស្ថានទូតក្នុងប្រទេសថៃគឺជាការលំបាក៕

ប្រែសម្រួលៈ ណៃ តុលា