បរទេស៖ ស្ថានទូតសហរដ្ឋអាមេរិកនៅទីក្រុងបាងកក កាលពីថ្ងៃសុក្របានចេញការព្រមានផ្នែកសុវត្ថិភាពសម្រាប់ពលរដ្ឋរបស់ខ្លួននៅក្នុងប្រទេសថៃ មួយថ្ងៃបន្ទាប់ពីថៃ បាននិរទេសជនជាតិអ៊ុយហ្គ័រមួយក្រុមទៅកាន់ប្រទេសចិន។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២៨ ខែកុម្ភៈ ឆ្នាំ២០២៥ បានឱ្យដឹងថា សេចក្តីជូនដំណឹងដែលបានបង្ហោះនៅលើគេហទំព័រស្ថានទូតបាននិយាយថា “ការនិរទេសស្រដៀងគ្នានេះបានជំរុញឱ្យមានការវាយប្រហារសងសឹកដោយហិង្សានាពេលកន្លងមក” ។
លើសពីនេះទៅទៀត បន្ទាប់ពីការបណ្តេញជនជាតិ អ៊ុយហ្គ័រ ចេញពីប្រទេសថៃកាលពីឆ្នាំ ២០១៥ មានការបំផ្ទុះនៅទីសក្ការៈ Erawan ក្នុងទីក្រុងបាងកក បានសម្លាប់មនុស្ស ២០ នាក់ និងរបួស ១២៥ នាក់ផ្សេងទៀត ដោយសារទីសក្ការបូជានេះត្រូវបានភ្ញៀវទេសចរមកពីប្រទេសចិនមកទស្សនាយ៉ាងច្រើន។
នៅមុននេះ រដ្ឋមន្ត្រីការបរទេសអាមេរិក លោក Marco Rubio បានថ្កោលទោសប្រទេសថៃ ចំពោះការបញ្ជូនជនជាតិ អ៊ុយហ្គ័រ ៤០ នាក់ ទៅកាន់ប្រទេសចិន ដែលទីក្រុងវ៉ាស៊ីនតោន និយាយថា សមាជិកនៃក្រុមមូស្លីម បានប្រឈមមុខនឹងការប្រល័យពូជសាសន៍។
យ៉ាងណាក៏ដោយ អាជ្ញាធរថៃបានទទូចថា ជនជាតិអ៊ុយហ្គួរត្រឡប់មកវិញដោយស្ម័គ្រចិត្ត ហើយចិនបានធានាថាពួកគេនឹងមិនរងគ្រោះអ្វីឡើយ៕
ប្រែសម្រួលៈ ណៃ តុលា
