ម៉ាឡេស៊ី ណែនាំពលរដ្ឋខ្លួន កុំឱ្យទៅលេង ភាគខាងត្បូងប្រទេសថៃ ក្រោយការបំផ្ទុះគ្រាប់បែក និងបាញ់ប្រហារ បណ្តាលឱ្យមនុស្សស្លាប់ និងរបួស ១០នាក់

បរទេស៖ ប្រទេសម៉ាឡេស៊ី បានណែនាំពលរដ្ឋរបស់ខ្លួន ឱ្យបញ្ឈប់ផែនការទៅលេងប្រទេសថៃ ភាគខាងត្បូង បន្ទាប់ពីការបំផ្ទុះគ្រាប់បែក និងការបាញ់ប្រហារនៅទីក្រុង Sungai Kolok ព្រំដែនថៃ ដែលជាគោលដៅពេញនិយម សម្រាប់ប្រជាជនម៉ាឡេស៊ី និងនៅប៉ាតានី។

យោងតាមសារព័ត៌មាន បាងកក ប៉ុស្តិ៍ ចេញផ្សាយកាលពីថ្ងៃទី៩ ខែមីនា ឆ្នាំ២០២៥ បានឱ្យដឹងថា ប្រព័ន្ធផ្សព្វផ្សាយម៉ាឡេស៊ីបានរាយការណ៍ថា អគ្គអធិការប៉ូលិសលោក Razarudin Husain កាលពីថ្ងៃអាទិត្យ បានណែនាំប្រជាជនឱ្យលុបចោលផែនការ ណាមួយ ដើម្បីធ្វើដំណើរទៅភាគខាងត្បូងប្រទេសថៃ ។

លោកបានបន្ថែមថា អាជ្ញាធរសន្តិសុខម៉ាឡេស៊ីបានបង្កើនការល្បាត និងបង្កើនវិធានការ នៅព្រំដែនជាមួយស្រុក Sungai Kolok ដើម្បីការពារក្រុមបះបោរ ដែលចូលមកម៉ាឡេស៊ី ឆ្លងកាត់ទន្លេ Kolok ។ ការព្រមានរបស់លោកបានកើតឡើង បន្ទាប់ពីការបំផ្ទុះគ្រាប់បែក និងការបាញ់ប្រហារបានកក្រើកក្រុង Sungai Kolok ក្នុងខេត្ត Narathiwat ក្នុងប្រទេសថៃ កាលពីយប់ថ្ងៃសៅរ៍ ។

សេចក្តីរាយការណ៍ដំបូង បាននិយាយថា ទីតាំងចំនួនបី នៅក្នុងទីក្រុងត្រូវបានបំផ្ទុះគ្រាប់បែក ប៉ុន្តែក្រោយមកព័ត៌មាន បានលេចឡើង នៃការវាយប្រហារទីបួន ដែលជាការបំផ្ទុះនៅកោះមួយនៅខាងក្រោយកីឡដ្ឋាន Maharat ប៉ុន្តែមិនបណ្តាល ឱ្យមានអ្នករងរបួសនោះទេ។

ការបំផ្ទុះគ្រាប់បែក និងការបាញ់ប្រហារ នៅសាលាស្រុកប្រហែលម៉ោង ៧ និង១០នាទីយប់ បានសម្លាប់មនុស្សពីរនាក់ និងរបួសយ៉ាងតិចទាហានស្ម័គ្រចិត្ត ការពារប្រាំបីនាក់ ៕
ប្រែសម្រួលៈ ណៃ តុលា