សេអ៊ូល៖ កូរ៉េខាងជើង បានថ្កោលទោសអ្នកការទូតកំពូលនៃក្រុមប្រទេសទាំងប្រាំពីរ (G7) អំពាវនាវឱ្យក្រុងព្យុងយ៉ាងបោះបង់អាវុធនុយក្លេអ៊ែររបស់ខ្លួន ដោយគំរាមពង្រឹងកម្លាំងនុយក្លេអ៊ែររបស់ខ្លួនទាំងគុណភាព និងបរិមាណ នេះបើយោងតាមការចុះផ្សាយរបស់ទីភ្នាក់ងារសារព័ត៌មានយុនហាប់។
បន្ទាប់ពីកិច្ចប្រជុំនៅទីក្រុង La Malbaie ប្រទេសកាណាដា រដ្ឋមន្ត្រីការបរទេសនៃប្រទេសជឿនលឿន G7 បានចេញសេចក្តីថ្លែងការណ៍រួមមួយកាលពីថ្ងៃសុក្រ ដែលអំពាវនាវឱ្យកូរ៉េខាងជើងបោះបង់កម្មវិធីនុយក្លេអ៊ែរ និងមីស៊ីលផ្លោងរបស់ខ្លួន ហើយថ្កោលទោសជំនួយយោធារបស់ខ្លួនដើម្បីគាំទ្រសង្គ្រាមរបស់រុស្ស៊ីនៅអ៊ុយក្រែន។
ក្រសួងការបរទេសកូរ៉េខាងជើងបានថ្កោលទោស G7 ចំពោះការយកបញ្ហាជាមួយការអនុវត្តសិទ្ធិអធិបតេយ្យភាពរបស់កូរ៉េខាងជើង ដោយនិយាយថាវាជា G7 ដែលផ្តោតលើ “ការរីកសាយអាវុធនុយក្លេអ៊ែរខុសច្បាប់” ក្រោមលេសនៃការចែករំលែកនុយក្លេអ៊ែរ ឬផ្តល់នូវការទប់ស្កាត់បន្ថែម នេះបើយោងតាមទីភ្នាក់ងារសារព័ត៌មានកណ្តាលកូរ៉េ (KCNA) ។
ក្រសួងបានឲ្យដឹងនៅក្នុងសេចក្តីថ្លែងការណ៍មួយដែលធ្វើឡើងដោយ KCNA ថា “G7 ដែលបានប្រែក្លាយទៅជាក្រុមឧក្រិដ្ឋជននុយក្លេអ៊ែរ ដែលគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខពិភពលោក គួរតែបោះបង់ចោលនូវមហិច្ឆតាអនាធិបតេយ្យរបស់ខ្លួន សម្រាប់អនុត្តរភាពនុយក្លេអ៊ែរ មុនពេលនិយាយអំពីការរំសាយនុយក្លេអ៊ែរ និងការរុះរើកម្មវិធីនុយក្លេអ៊ែរ” ។
កូរ៉េខាងជើងបានឲ្យដឹងថា ស្ថានភាពរបស់ប្រទេសជារដ្ឋនុយក្លេអ៊ែរ ដែលកំណត់ដោយរដ្ឋធម្មនុញ្ញ នឹងមិនផ្លាស់ប្តូរឡើយ ទោះជាពិភពលោកខាងក្រៅទទួលស្គាល់ ឬអត់ក៏ដោយ នេះបើយោងតាមការចុះផ្សាយរបស់ទីភ្នាក់ងារសារព័ត៌មានយុនហាប់។
ក្រសួងបានឲ្យដឹងទៀតថា ប្រទេសកូរ៉េខាងជើង “នឹងធ្វើបច្ចុប្បន្នភាពជាលំដាប់ និងពង្រឹងកងកម្លាំងប្រដាប់អាវុធនុយក្លេអ៊ែររបស់ខ្លួនទាំងគុណភាព និងបរិមាណ ដើម្បីឆ្លើយតបទៅនឹងការគំរាមកំហែងនុយក្លេអ៊ែរពីខាងក្រៅ ដូចដែលមានចែងក្នុងរដ្ឋធម្មនុញ្ញ និងច្បាប់ក្នុងស្រុកផ្សេងទៀត”៕
ប្រែសម្រួល ឈូក បូរ៉ា
