អ្នកនេសាទដែលបាត់ខ្លួនអស់រយៈពេល ៩៥ ថ្ងៃនៅមហាសមុទ្រប៉ាស៊ីហ្វិកបានត្រឡប់មកផ្ទះវិញហើយ

ប៉េរូ៖យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា អ្នកនេសាទជនជាតិប៉េរូម្នាក់ដែលបានរស់នៅក្នុងមហាសមុទ្រប៉ាស៊ីហ្វិកអស់រយៈពេល ៩៥ ថ្ងៃដោយស៊ីសត្វកន្លាត និងអណ្តើកសមុទ្រដើម្បីរស់រានមានជីវិត កំពុងត្រឡប់ទៅផ្ទះវិញ ដើម្បីជួបជុំក្រុមគ្រួសាររបស់លោក។

លោក Maximo Napa បានចេញដំណើរសម្រាប់ការធ្វើដំណើរនេសាទពីទីក្រុង Marcona ជាទីក្រុងមួយនៅឆ្នេរសមុទ្រភាគខាងត្បូងនៃប្រទេសប៉េរូកាលពីថ្ងៃទី ៧ ខែធ្នូ។ លោកបានខ្ចប់អាហារសម្រាប់ការធ្វើដំណើររយៈពេល ២ សប្តាហ៍ ប៉ុន្តែរយៈពេល ១០ ថ្ងៃក្នុងអាកាសធាតុមានព្យុះបានបោះទូករបស់លោកចេញពីផ្លូវ ហើយលោកបានក៏បាត់ដំណឹងឈឹងក្នុងមហាសមុទ្រប៉ាស៊ីហ្វិក។

គ្រួសាររបស់លោកបានចាប់ផ្តើមការស្វែងរក ប៉ុន្តែអ្នកល្បាតដែនសមុទ្ររបស់ប្រទេសប៉េរូមិនអាចកំណត់ទីតាំងលោកបានទេរហូតដល់ថ្ងៃពុធ នៅពេលអ្នកល្បាតនេសាទអេក្វាឌ័របានរកឃើញលោកនៅចម្ងាយប្រហែល ១,០៩៤ គីឡូម៉ែត្រពីឆ្នេរសមុទ្ររបស់ប្រទេស ដោយខ្វះជាតិទឹកយ៉ាងខ្លាំង និងស្ថិតក្នុងស្ថានភាពធ្ងន់ធ្ងរ។

លោក Napa បានប្រាប់ Reuters បន្ទាប់ពីបានជួបជុំជាមួយបងប្រុសរបស់លោកនៅ Paita ជិតព្រំដែនជាមួយអេក្វាឌ័រថា ខ្ញុំមិនចង់ស្លាប់ទេ ខ្ញុំបានស៊ីសត្វកន្លាត សត្វស្លាប អាហារចុងក្រោយដែលខ្ញុំស៊ីគឺអណ្តើកសមុទ្រ។

លោកបានបន្តថា ខ្ញុំនៅតែគិតយ៉ាងខ្លាំងអំពីគ្រួសាររបស់ខ្ញុំ រួមទាំងចៅស្រីអាយុ ២ ខែរបស់ខ្ញុំ សូម្បីតែខ្ញុំបានរស់រានមានជីវិតដោយសារទឹកភ្លៀង ខ្ញុំប្រមូលបាននៅលើទូក និងអស់អាហារ ទីបំផុតអស់រយៈពេល ១៥ ថ្ងៃចុងក្រោយដោយមិនបរិភោគ៕