ប្រ៊ុចសែល ៖ គណៈកម្មការអឺរ៉ុប បានដាក់ចេញនូវផែនការដ៏ទូលំទូលាយមួយ ដើម្បីបង្កើនសមត្ថភាពការពាររបស់សហភាពអឺរ៉ុប ក្នុងគោលបំណងពង្រឹង ការត្រៀមលក្ខណៈយោធា និងកាត់បន្ថយការ ពឹងផ្អែកលើសម្ព័ន្ធមិត្តមិនមែនសហភាពអឺរ៉ុប ចំពេលមានភាពមិនច្បាស់លាស់លើការគាំទ្ររបស់សហរដ្ឋអាមេរិក សម្រាប់អង្គការណាតូ នាពេលអនាគត។
ប្រធានគណៈកម្មាការអឺរ៉ុបលោកស្រី Ursula von der Leyen បានឲ្យដឹងនៅក្នុងសេចក្តីថ្លែងការណ៍មួយថា “សន្តិសុខ ដែលយើងពឹងផ្អែក មិនអាចត្រូវបានគេទទួលយកបានទៀតនោះទេ។ អឺរ៉ុបបានត្រៀមខ្លួនរួចជាស្រេច ដើម្បីឈានជើងទៅមុខ យើងត្រូវវិនិយោគលើវិស័យការពារជាតិ ពង្រឹងសមត្ថភាពរបស់យើង និងចាត់វិធានការយ៉ាងសកម្ម ចំពោះសន្តិសុខ” ។
ចំណុចស្នូលនៃផែនការ គឺសៀវភៅស សម្រាប់ការពារអឺរ៉ុប ការត្រៀមខ្លួនឆ្នាំ២០៣០ និងកញ្ចប់ការពារដែលផ្តល់ជំនួយ ហិរញ្ញវត្ថុដល់រដ្ឋជាសមាជិក សហភាពអឺរ៉ុប សម្រាប់ការជំរុញការវិនិយោគលើសមត្ថភាពការពារជាតិ ។ គណៈកម្មការបានឲ្យដឹងថា ទាំងនេះគឺជាផ្នែកមួយនៃផែនការការពារអឺរ៉ុប និងការត្រៀមខ្លួនសម្រាប់ឆ្នាំ២០៣០ ReArm Europe/Readiness 2030 ។
នៅក្នុងសៀវភៅសបានគូសបញ្ជាក់អំពីអាទិភាពសំខាន់ៗ រួមទាំងការដោះស្រាយគម្លាតផ្នែកការពារដ៏សំខាន់ដែលកំណត់ដោយរដ្ឋសមាជិកសហភាពអឺរ៉ុប និងការពង្រឹងឧស្សាហកម្មការពារជាតិ របស់អឺរ៉ុប តាមរយៈការបង្កើនកិច្ចខិតខំប្រឹងប្រែងលទ្ធកម្មរួមគ្នា នេះបើយោងតាមការចុះ ផ្សាយរបស់ទីភ្នាក់ងារសារព័ត៌មានចិនស៊ិនហួ។
សៀវភៅសក៏សង្កត់ធ្ងន់ផងដែរ អំពីតម្រូវការក្នុងការបង្កើនការគាំទ្រផ្នែកយោធាសម្រាប់អ៊ុយក្រែន និងពង្រីកទីផ្សារការពារ នៅសហភាពអឺរ៉ុប ដោយសម្រួលបទប្បញ្ញត្តិដើម្បីបង្កើនប្រសិទ្ធភាព និងកិច្ចសហប្រតិបត្តិការ។ បច្ចុប្បន្ននេះ បណ្តាប្រទេសអឺរ៉ុប ដំណើរការប្រព័ន្ធសព្វាវុធផ្សេងៗគ្នាជាច្រើន ដោយកំណត់នូវអន្តរប្រតិបត្តិការ និងប្រសិទ្ធភាព។
ជាផ្នែកមួយ នៃផែនការ ReArm Europe/Readiness 2030 គណៈកម្មាការបានកំណត់លើភាពបត់បែនសារពើពន្ធ សម្រាប់ការចំណាយ លើវិស័យការពារជាតិ ដោយកំណត់គម្លាតហិរញ្ញវត្ថុដោយរដ្ឋជាសមាជិកសហភាពអឺរ៉ុបក្នុងកម្រិតអតិបរមា ១.៥ ភាគរយនៃ GDP ក្នុងមួយឆ្នាំ ក្នុងអំឡុងពេលធ្វើឱ្យសកម្មនៃឃ្លារត់គេចខ្លួនជាតិសម្រាប់រយៈពេលរហូតដល់ ៤ ឆ្នាំ។
កាលពីដើមខែនេះ លោកស្រី von der Leyen បានណែនាំផែនការចំនួន ៨០០ ពាន់លានអឺរ៉ូ (៨៧៤.៦៤ ពាន់លានដុល្លារអាមេរិក) ដើម្បីបង្កើនការចំណាយលើវិស័យការពារជាតិយ៉ាងសំខាន់នៅទូទាំងប្លុកនេះ។ ផែនការនេះបានបង្កើតកម្មវិធីប្រាក់កម្ចីចំនួន ១៥០ ពាន់លានអឺរ៉ូ ដើម្បីជួយបណ្តាប្រទេសអឺរ៉ុប វិនិយោគរួមគ្នានៅក្នុងទ្រព្យសម្បត្តិយោធាសំខាន់ៗ ដោយគណៈកម្មការបានប្តេជ្ញាក្នុងការប្រមូលប្រាក់បន្ថែមចំនួន ៦៥០ ពាន់លានអឺរ៉ូ៕
ប្រែសម្រួល ឈូក បូរ៉ា
