បរទេស៖ ក្រុមប្រឹក្សាការទិញយកការពារជាតិរបស់ប្រទេសឥណ្ឌា បានផ្តល់ការយល់ព្រមដំបូងសម្រាប់ការទិញសព្វាវុធ និងបរិក្ខារតម្លៃលើសពី ៥៤០ ពាន់លានរូពី ឬស្មើនឹង ៦,២៦ ពាន់លានដុល្លារ ក្នុងគោលបំណងពង្រឹងសមត្ថភាពយោធារបស់ប្រទេសឥណ្ឌា។
យោងតាមសារព័ត៌មាន RT ចេញផ្សាយនៅថ្ងៃទី២១ ខែមីនា ឆ្នាំ២០២៥ បានឱ្យដឹងថា ការទិញយកដែលបានស្នើឡើងរួមមានម៉ាស៊ីនដែលបានធ្វើឱ្យប្រសើរឡើងសម្រាប់រថក្រោះប្រយុទ្ធ T-90 ផលិតដោយរុស្ស៊ីរបស់កងទ័ពឥណ្ឌា កាំភ្លើងប្រឆាំងនាវាមុជទឹកបន្ថែមសម្រាប់កងទ័ពជើងទឹក និងប្រព័ន្ធប្រកាសអាសន្ន និងគ្រប់គ្រងលើអាកាសសម្រាប់កងទ័ពអាកាស។
ក្រសួងបាននិយាយថា ការទិញម៉ាស៊ីនរថក្រោះ T-90 នឹងបង្កើនប្រសិទ្ធភាពប្រតិបត្តិការនៃរថក្រោះប្រយុទ្ធដ៏ខ្លាំងក្លាបំផុតមួយរបស់ប្រទេសឥណ្ឌា។ នៅខែតុលា ឆ្នាំ ២០២៤ ឥណ្ឌាបានជួសជុលរថក្រោះ T-90 Bhishma ដែលផលិតដោយរុស្ស៊ី ដើម្បីពន្យារពេលប្រើប្រាស់យ៉ាងហោចណាស់ ២០ ឆ្នាំទៀត។
លើសពីនេះ គណៈកម្មាធិការគណៈរដ្ឋមន្ត្រីឥណ្ឌាស្តីពីសន្តិសុខ (CCS) ដឹកនាំដោយនាយករដ្ឋមន្ត្រី Narendra Modi កាលពីថ្ងៃពុធបានអនុម័តកិច្ចព្រមព្រៀង ៨២៣ លានដុល្លារ ដើម្បីទិញប្រព័ន្ធកាំភ្លើងធំ Advanced Towed Artillery Gun Systems (ATAGS) នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុក។ NDTV បានរាយការណ៍ថា កងទ័ពឥណ្ឌានឹងបន្តទិញកាំភ្លើង 155mm ដែលផលិតក្នុងស្រុកទាំងនេះ។ ទីក្រុងញូវដែលីនឹងទិញកាំភ្លើងបែបនេះចំនួន ៣០៧ ដើម៕
ប្រែសម្រួលៈ ណៃ តុលា
