តូក្យូ៖ ការវាយតម្លៃការអនុម័តសម្រាប់ គណៈរដ្ឋមន្ត្រីរបស់នាយករដ្ឋមន្ត្រីជប៉ុនលោក Shigeru Ishiba បានធ្លាក់ចុះមកនៅត្រឹម ២៧.៦ ភាគរយ ដែលជាកម្រិតទាបបំផុតចាប់តាំងពី លោកបានចូលកាន់តំណែងក្នុងខែតុលា បន្ទាប់ពីមានការបង្ហាញដែលថា លោកបានប្រគល់ប័ណ្ណអំណោយ ដល់សមាជិកសភាគណបក្សកាន់អំណាចថ្មី នេះបើតាមការស្ទង់មតិរបស់សារព័ត៌មានក្យូដូជប៉ុន បានបង្ហាញកាលពីថ្ងៃអាទិត្យ។
ការស្ទង់មតិតាមទូរស័ព្ទចុងសប្តាហ៍ក៏បានរកឃើញថា ៧១.៦ ភាគរយនៃអ្នកឆ្លើយតបបានជំទាស់នឹង ការចែកចាយប័ណ្ណដែលមានតម្លៃស្មើសាច់ប្រាក់របស់ Ishiba ដែលមានតម្លៃ ១០០,០០០ យ៉េន (៦៧០ ដុល្លារ) ម្នាក់ៗដល់សមាជិកសភានៃ គណបក្សប្រជាធិបតេយ្យសេរីរបស់លោក។
លោក Ishiba ត្រូវបានគេមើលឃើញថា ជាអ្នកនយោបាយស្អាតស្អំលើបញ្ហាលុយ មុនពេលរឿងអាស្រូវចុងក្រោយនេះលេចចេញជារូបរាង ខណៈដែល LDP ដែលកាន់អំណាចភាគច្រើនតាំងពីឆ្នាំ១៩៥៥ ជាប់ពាក់ព័ន្ធជាមួយរឿងអាស្រូវ ថវិកានយោបាយយូរមកហើយ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានក្យូដូជប៉ុន។
ការគាំទ្រសម្រាប់គណៈរដ្ឋមន្ត្រីមាន ៣៩.៦ ភាគរយកាលពីខែមុន។ នៅក្នុងខែមីនា ការវាយតម្លៃមិនពេញចិត្តសម្រាប់គណៈរដ្ឋមន្ត្រីរបស់ Ishiba បានកើនឡើង ១៦.០ ពិន្ទុដល់ ៥៧.៨ ភាគរយ ដែលបង្កឱ្យមានការសង្ស័យលើការដឹកនាំរបស់គាត់ ក្នុងការដឹកនាំរដ្ឋាភិបាលដែលកំពុងធ្លាក់ចុះរួចទៅហើយ។
ការស្ទង់មតិរយៈពេលពីរថ្ងៃត្រូវបានធ្វើឡើងបន្ទាប់ពីលោក Ishiba បានទទួលស្គាល់ថាការិយាល័យរបស់គាត់ បានផ្តល់វិញ្ញាបនបត្រអំណោយ ប៉ុន្តែបានអះអាងថាការអនុវត្តមិនបង្កបញ្ហាផ្លូវច្បាប់ទេ ដែលជំរុញឱ្យសមាជិក LDP មួយចំនួនបង្ហើបថានាយករដ្ឋមន្ត្រីមុនៗ បានចូលរួមក្នុងការប្រព្រឹត្តស្រដៀងគ្នានេះ។
កាលពីសប្តាហ៍មុន ប្រភពគណបក្សកាន់អំណាចបានបង្ហាញថា ការិយាល័យរបស់អតីតនាយករដ្ឋមន្ត្រីលោក Fumio Kishida ដែលជាអ្នកកាន់តំណែងមុនរបស់ Ishiba បានផ្តល់ប័ណ្ណអំណោយដែលមានតម្លៃ ១០០,០០០ យ៉េនម្នាក់ៗដល់អនុរដ្ឋមន្ត្រីសភាក្នុងអំឡុងពេលជួបជុំអាហារ ឆ្នាំ២០២២ ជាមួយនាយករដ្ឋមន្រ្តីនៅពេលនោះ។ ភ័ស្តុតាងថ្មីៗក៏បានលេចចេញផងដែរ ដែលចង្អុលទៅការអនុវត្តដ៏ចម្រូងចម្រាស ដ៏យូរអង្វែងក្នុងចំណោមនាយករដ្ឋមន្ត្រីជប៉ុន ដោយសមាជិកសភា LDP បាននិយាយថា លោកបានទទួលប័ណ្ណសមមូលសាច់ប្រាក់ បន្ទាប់ពីបានជាប់ឆ្នោតក្នុងឆ្នាំ២០១២ ៕
ប្រែសម្រួល ឈូក បូរ៉ា
