បរទេស៖ យោងតាមរដ្ឋាភិបាលបានឱ្យដឹងថា ក្រសួងសេដ្ឋកិច្ច និងសង្គមឌីជីថល (DES) របស់ប្រទេសថៃ បាន Block ឬ រារាំង URLs ឬWebsite ជាង ៩.៥០០ ដែលពាក់ព័ន្ធនឹងការលក់បារី អេឡិចត្រូនិចក្នុងឆ្នាំកន្លងទៅ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២៥ ខែមីនា ឆ្នាំ២០២៥ បានឱ្យដឹងថា អ្នកនាំពាក្យរងរដ្ឋាភិបាល គឺលោកស្រី Sasikarn Wattanachan បាននិយាយថា ការបង្រ្កាបលើក្រុមលក់បារីអេឡិចត្រូនិច គឺជាផ្នែកមួយ នៃកិច្ចខិតខំប្រឹងប្រែង របស់រដ្ឋាភិបាល ក្នុងការបិទបណ្តាញអនឡាញ ទាំងអស់ រួមទាំងគណនីប្រព័ន្ធផ្សព្វផ្សាយសង្គម និងគេហទំព័រដែលប្រើប្រាស់ក្នុងការលក់ និងការរត់ពន្ធ vapes ។
ចាប់ពីខែមីនា ឆ្នាំ ២០២៤ រហូតដល់ថ្ងៃទី១៩ ខែមីនា ឆ្នាំ២០២៥ ក្រសួងបានទប់ស្កាត់វែបសាយចំនួន ៩ ៥១៥ URLs ដែលលក់ ឬនាំចូលបារីអេឡិចត្រូនិច។ គណនី X ចំនួន ៩.២០០, គេហទំព័រ ២៣៥, គណនី Facebook ២៨, គណនី Instagram ចំនួន១២ និងគណនី TikTok ចំនួន ១៤ ត្រូវបានបិទ។
ក្រសួងក៏បានបិទក្រុម Facebook ចំនួន ១២០ ដែលភ្ជាប់នឹងបារីអេឡិចត្រូនិក។ លោកស្រី Sasikarn Wattanachan បាននិយាយផងដែរថា ក្រសួងបានប្រើប្រាស់ឧបករណ៍ស្តាប់សង្គម និងឧបករណ៍ត្រួតពិនិត្យទិន្នន័យ ហើយបានរកឃើញចំនួន បណ្តាញ ២៨៥ បានប្រកាសលើបារីអេឡិចត្រូនិចពីសំណាក់អ្នកលក់ និង ៩៣ ប្រកាសពីអ្នកទិញ។
យោងតាមច្បាប់ការពារអ្នកប្រើប្រាស់ អ្នកដែលលក់បារីអេឡិចត្រូនិច និងឧបករណ៍ពាក់ព័ន្ធអាចប្រឈមមុខនឹងការជាប់ពន្ធនាគាររយៈពេល ៣ ឆ្នាំ ពិន័យជាប្រាក់អតិបរមា ៦០០.០០០ បាត ឬទាំងពីរ៕
ប្រែសម្រួលៈ ណៃ តុលា
