បរទេស៖ ប្រធានាធិបតីអាមេរិក លោក Donald Trump បាននិយាយនៅថ្ងៃអាទិត្យថា “ខ្ញុំមិននិយាយលេងទេ” អំពីការព្យាយាមដើម្បីបន្តតំណែងសម្រាប់អាណត្តិទីបី ដែលជាសញ្ញាច្បាស់លាស់បំផុត ដែលលោកកំពុងពិចារណា វិធីដើម្បីបំពានលើរបាំងរដ្ឋធម្មនុញ្ញ ប្រឆាំងនឹងការបន្តដឹកនាំប្រទេសបន្ទាប់ពី អាណត្តិទីពីររបស់លោកបានបញ្ចប់ នៅដើមឆ្នាំ២០២៩។
យោងតាមសារព័ត៌មាន AP ចេញផ្សាយនៅថ្ងៃទី៣១ ខែមីនា ឆ្នាំ២០២៥ បានឱ្យដឹងថា លោក Trump បាននិយាយនៅក្នុងបទសម្ភាសន៍ តាមទូរស័ព្ទជាមួយ NBC News ពី Mar-a-Lago ដែលជាក្លឹបឯកជនរបស់លោកថា “មានវិធីសាស្រ្តដែលអ្នកអាចធ្វើវាបាន” ។
លោកបានពន្យល់លម្អិតនៅពេលក្រោយ ទៅកាន់អ្នកសារព័ត៌មាននៅលើយន្តហោះ Air Force One ពីរដ្ឋ Florida ទៅកាន់ទីក្រុង Washington ថា “ខ្ញុំមានមនុស្សជាច្រើនសុំឱ្យខ្ញុំបន្តនៅអាណត្តិទី៣ ដែលតាមវិធីមួយគឺជាអាណត្តិទី៤ ពីព្រោះការបោះឆ្នោតផ្សេងទៀត ការបោះឆ្នោតឆ្នាំ ២០២០ គឺមិនច្បាស់លាស់ទាំងស្រុង” ។ លោក Trump បានចាញ់ការបោះឆ្នោតនោះទៅ ឱ្យអ្នកប្រជាធិបតេយ្យលោក Joe Biden ។
ទោះយ៉ាងណា លោក Trump បានបន្ថែមថា “ខ្ញុំមិនចង់និយាយអំពីអាណត្តិទីបីទេ ពីព្រោះមិនថាអ្នកមើលវាយ៉ាងណា យើងមានពេលយូរដើម្បីទៅ” ។
សូមជម្រាបថា វិសោធនកម្មលើកទី ២២ ដែលបានបន្ថែមទៅរដ្ឋធម្មនុញ្ញក្នុងឆ្នាំ ១៩៥១ បន្ទាប់ពីប្រធានាធិបតី Franklin D. Roosevelt ត្រូវបានបោះឆ្នោតជ្រើសរើសបួនដងជាប់ៗគ្នានិយាយថា “គ្មាននរណាម្នាក់នឹងត្រូវបានជ្រើសរើស ឱ្យកាន់តំណែងប្រធានាធិបតីលើសពីពីរដងទេ” ៕
ប្រែសម្រួលៈ ណៃ តុលា
