បរទេស៖ យោងតាមការចេញផ្សាយរបស់ RT ដែលបានដកស្រង់ចេញពីកាសែត Wall Street Journal បានរាយការណ៍កាលពីថ្ងៃចន្ទថា កូនប្រុសច្បងទាំងពីររបស់ប្រធានាធិបតីអាមេរិក Donald Trump កំពុងវិនិយោគនៅក្នុងក្រុមហ៊ុនជីកយករ៉ែ Bitcoin ដ៏ធំមួយ។
លោកTrumps បានព្យាយាមចូលរួមពាក់ព័ន្ធកាន់តែខ្លាំងជាមួយនឹងឧស្សាហកម្មគ្រីបតូ តាមរយៈការបណ្តាក់ទុនថ្មី ការវិនិយោគ និងការយល់ព្រមជាសាធារណៈ ក្នុងប៉ុន្មានខែថ្មីៗនេះ។
យោងតាមកាសែត WSJ ដដែលបានបញ្ជាក់ថាលោក Eric Trump និង Donald Trump Jr. គ្រោងនឹងបញ្ចូលគ្នានូវក្រុមហ៊ុនរបស់ពួកគេគឺ American Data Centers ជាមួយនឹងការបណ្តាក់ទុន រុករករ៉ែថ្មីមួយហៅថា American Bitcoin ដែលភាគច្រើនគ្រប់គ្រងដោយ Hut 8 ដែលជាក្រុមហ៊ុនហេដ្ឋារចនាសម្ព័ន្ធគ្រីបតូ ដែលបានជួញដូរជាសាធារណៈមួយ។
លោក Eric ដែលនឹងបម្រើការជាប្រធានយុទ្ធសាស្រ្តរបស់ Bitcoin របស់អាមេរិកបានប្រាប់ WSJ ថា ៖យើងជាគ្រួសារដែលមានទ្រព្យសកម្ម ដោយបន្ថែមថា ជីវិតរបស់ខ្ញុំទាំងមូលត្រូវបានចំណាយលើការកសាងរបស់មុខរបរ ហើយខ្ញុំមិនគិតថាមានការការពារប្រឆាំងនឹង អ្វីៗទាំងអស់ដែលប្រសើរជាងទ្រព្យសម្បត្តិឌីជីថលពិតប្រាកដនោះទេ។
ក្រុមហ៊ុនHut 8 ដែលមានមូលដ្ឋាននៅទីក្រុងម៉ៃអាមី នឹងផ្ទេរម៉ាស៊ីនជីករ៉ែឯកទេសជិតចំនួន ៦១,០០០របស់ខ្លួនទៅឱ្យ ក្រុមហ៊ុនថ្មី American Bitcoin ជាថ្នូរនឹងភាគហ៊ុន៨០ភាគរយនៅក្នុងក្រុមហ៊ុនថ្មី នេះបើយោងតាមរបាយការណ៍។ ទោះបីជាយ៉ាងណាក្តីក្រុមហ៊ុន Hut 8 បាននិយាយនៅក្នុងសេចក្តីប្រកាសព័ត៌មានកាលពីថ្ងៃចន្ទថា គ្មានសាច់ប្រាក់ផ្លាស់ប្តូរដៃនៅក្នុងកិច្ចព្រមព្រៀងនោះទេ៕
ប្រែសម្រួល៖ស៊ុនលី
